Emil Balayev: Ayntraxtda da mənim daha çox oyun təcrübəsi qazanmağımı istəyirlər
Azərbaycan yığmasının və Almaniyanın "Ayntraxt" klubunun qapıçısı Emil Balayevin azerisport.az saytına müsahibəsi
- Bu yaxınlarda Almaniya mətbuatı "Ayntraxt"ın sizi satmaq və ya icarəyə vermək fikrinə düşdüyünü yazmışdı...
- Şəxsən mənim özümlə bu barədə söhbət edən olmamışdı. Bu xəbərlər çıxandan sonra özüm yaxınlaşıb soruşdum. Onlar bildirdilər ki, mənim potensialımı açmaq istəyirlər. Məşqlərdəki çalışmalarımdan razıdırlar. Amma hələ Bundesliqada oyun təcrübəsi qazana bilməmişəm. Bu üzdən də oyun təcrübəmin olmasını istəyirlər.
- Başqa klublardan sizinlə maraqlananlar var?
- Xeyr, heç kim. Ola bilsin ki, kluba müraciət edənlər olub. Amma bütün bunlardan mənim xəbərim olmayıb.
- Türkiyə klublarının sizinlə maraqlandığı bildirilirdi. Belə bir şey olub?
- Bəli, mənə də Türkiyə variantı barədə danışılıb. Amma mən özüm bu varianta baxmaq istəmədim.
- Məşqçilər korpusu sizə oyun təcrübəsi qazandırmaq üçün ən azı autsayderlərlə görüşlərdə şans verməyi düşünmür?
- Bu barədə danışığımız olmayıb.
- Siz özünüz də yeni klub axtarmırsınız?
- Xeyr. Bununla heç maraqlanmamışam da.
- Yoxlama oyunlarında sizi sınaqdan keçirirlər?
- Ötən həftə "Sandhauzen"lə görüşdük. Bu komanda hazırda ikinci Bundesliqada ilk üçlükdə qərarlaşıb. Birinci hissədə meydanda oldum. Şənbə günü isə Bundesliqada oyunumuz var.
- Yığmamızın Xorvatiya və Malta ilə seçmə mərhələ oyunlarına dəvət almamağınızı necə qarşıladınız?
- Bu, məşqçilərin qərarıdır. Onların qərarına hörmətlə yanaşıram. Əlbəttə, yenidən milli komandaya dəvət almaq şərəfli olardı.
- Xorvatlar (0:0) və maltalılarla (2:2) heç-heçələr barədə nə deyə bilərsiniz?
- Özünüz də görürsünüz ki, yığmamız son oyunlarda yaxşı futbol sərgiləyir, uduzmur. Komanda hər oyunda gözəl futbol sərgiləməyə çalışır. Eyni zamanda nəticələr də pis deyil. Bu, Avropa futboluna yaxınlaşmaq baxımından önəmli addımdır.
- Bəs U-21 yığmamızın Avstriya (0:2) və Almaniyaya (0:3) məğlubiyyətlərini necə qarşıladınız?
- Həmin oyunlara baxmamışam. Amma nəticələr... Mənə elə gəlir ki, futbolçularımızda uğur qazanmaq istəyi çoxdur. Məşqçilərimizin də həmçinin. Onlar səylə çalışırlar. Bütün kollektiv çalışır. Amma özünüz də bilirsiniz ki, Almaniya və Avstriya futbolu hazırda hansı səviyyədədir. Heyətlərində necə usta oyunçuların yer aldığı da hamıya bəllidir.
