Qriqorçuk: Antonovun müsahibəsini oxumamışam, amma bu barədə onunla danışacağam

"Qəbələ"nin baş məşqçisi Roman Qriqorçuk komandasının hücumçusu Aleksey Antonovun Ukrayna mətbuatına müsahibəsində azərbaycanlı jurnalistlərin ünvanına səsləndirdiyi xoşagəlməz ifadələrə münasibət bildirib. Azerisport.az saytına açıqlamasında o, bunları söyləyib:

"Futbolçularla məşqçilərin jurnalistlərlə münasibətində hörmət olmalıdır. Özü də bu, ikitərəfli olmalıdır. Jurnalistlərə hörmət etməliyik. Hamımız futbolun inkişafına çalışırıq. Mən onun verdiyi müsahibəni oxumamışam. Amma bu barədə ondan soruşacağam. Futbolçularıma da demişəm ki, jurnalistikanın səviyyəsi ciddidir və mətbuat nümayəndələri ilə danışarkən diqqətli olmalıyıq. Hətta nəticələr ürəkaçan olmayanda da jurnalistlərlə danışmaqdan imtina etmək olmaz. Qeyri-peşəkar jurnalistlər hər bir ölkədə var. Bütün jurnalistlərlə danışmaq mümkün deyil. Amma yalnız peşəkarla danışıb, qeyri-peşəkarlarla danışmamaq da mümkünsüzdür. O, heç vaxt müsahibə verməkdən imtina etmir. Aleksey çox yaxşı insandır".