Ürfan Abbasov: Qəbələ qrupdan da çıxa bilər
"Qəbələ"nin müdafiəçisi Ürfan Abbasovun azerisport.az saytına müsahibəsi
- Komandanızın yeni transferləri - Derlis Meza Kolli ilə Fakundo Pereyranın faydalı olacağına inanırsınız?
- Əsas odur ki, hər ikisi yaxşı futbolçudur. Məsələn, Derlisi öz çempionatımızdan yaxşı tanıyıram. O, "İnter"in heyətində yaxşı çıxış edirdi. Fakundo isə Yunanıstan PAOK-unda çıxış edir, yaxşı oynayıb. Fikrimcə, onlar bizim oyun sxemimizə uyğun futbolçulardır. Hər halda bu, baş məşqçimizə daha yaxşı bəllidir.
- Cavid Hüseynovun yoxluğu bundan sonrakı oyunlarda da hiss olunacaq?
- Cavidin yeri həmişə görünəcək. Allah eləsin ki, o, tezliklə komandaya qayıtsın.
- "Qəbələ"nin Avroliqadakı tarixi uğuru ilə bağlı nə deyə bilərsiniz?
- Bu uğuru sözlə ifadə etmək çətindir.
- "Panatinaikos"la ev oyunundakı qolsuz heç-heçədən sonra Afinada uğur qazanacağınızı gözləyirdiniz?
- Hamı rəqibin necə güclü komanda olduğunu bilirdi. Amma Yunanıstan klubu keçilməz rəqib deyildi. Erkən qol sözünü dedi. Ondan sonra yunanlar irəli atıldılar. Belədə bizim üçün boşluqlar yaranmağa başladı. Həm də biz rəqibdən fərqli yüzfaizli qol vəziyyətləri yaradırdıq.
- Sizcə, PAOK, "Krasnodar" və Dortmund "Borussiya"sı ilə mübarizədə şanslarınız necədir?
- "Borussiya" kimi Avropa nəhənginə qarşı mübarizə aparmaq tamamilə fərqli hisslərdir. Bu komanda barədə nəsə demək artıq olardı. Necə yaxşı və güclü kollektivə malik olduqlarını hamı bilir. Amma istənilən halda futbolda hər şey mümkündür. Sadəcə, yaxşı hazırlaşmaq lazımdır.
- Bəziləri "Qəbələ"nin "Qarabağ"la müqayisədə daha çox bəxtinin gətirdiyini düşünür...
- Mən belə deməzdim. Bu mərhələdə ümumiyyətlə, zəif rəqib olmur. Hamısı güclüdür.
- "Borussiya" qrupun favoritidirsə, digər rəqiblərinizlə bağlı nə deyə bilərsiniz? "Qəbələ" ikinci yeri tuta bilər?
- Niyə də yox? Hələ bu yaxınlara kimi bizim "Panatinaikos"u keçəcəyimizə də heç kim innamırdı. Hər şey yaxşı olsa, qrupdan da çıxa bilərik.
- Azərbaycan yığmasının Xorvatiya (0:0) və Malta (2:2) ilə oyunlarına dəvət alan 30 futbolçu arasında sizin də adınız var idi. Amma sonradan Robert Prosineçki sizi həmin siyahıdan çıxardı. Səbəb nə idi?
- Bu, baş məşqçinin qərarı idi. Buna da hörmətlə yanaşıram. Əsas odur ki, komandamız uğur qazandı.
