Bədavi Hüseynov: Malta ilə oyunda qələbə bizə qismət deyilmiş
Azərbaycan yığmasının müdafiəçisi Bədavi Hüseynov AÇ-2016-nın seçmə mərhələsi çərçivəsində Maltaya qarşı oyundan (2:2) sonra azerisport.az saytının suallarını cavablandırıb.
- Birinci hissədə yaxşı çıxış etsəniz də, fasilədən sonra əksinə oldu. Nə baş verdi ki?
- Çox ağır oyun oldu. Həm biz, həm də Malta yığması meydana üç xal üçün çıxmışdı. Hər iki komanda üç gün öncə matça çıxdığından yorğunluq da var idi. Hava da çox isti idi. Bu da oyunun tempinə az təsir göstərmirdi. Hər şeyə rəğmən, oyunda üstünlük bizim tərəfimizdə idi. Təəssüf ki, səhvlərə yol verdik və bu səhvlər qələbə qazanmağımıza mane oldu. Rəqib buraxdığımız səhvləri bağışlamadı.
- Hesab 1:2 olarkən məğlub olacağınıza dair qorxu yaranmamışdı?
- Bizim qol vurmaq üçün çox şansımız oldu. Amma oyunda elə dönüş yarandı ki, rəqibdən çəkinməyə başladıq. Sonradan meydana çıxan futbolçular bizə çox kömək etdilər.
- Üçüncü qolu da vurmağımız mümkün idi. Buna nə mane oldu?
- Bəli, belə bir şansımız da oldu. Amma rəqib qolkiper inanılmaz seyv nümayiş etdirdi. Görünür, qələbə qazanmaq qismət deyilmiş.
- Maltanın vurduğu ikinci qolda birbaşa sizin səhviniz vardı...
- Bəli, mənim səhvimdən sonra qol buraxdıq. Mən topu düzgün qəbul edə bilmədim. Hava mübarizəsindən sonra top rəqibin önünə düşdü və o, qapımıza dəqiq zərbə endirdi.
- Yığmamız bu oyundakı xal itkisi nəticəsində qrup üçüncüsü olmaq şansını itirdi...
- Biz seçmə mərhələyə çox pis başladıq. Bu da turnir cədvəlində daha yaxşı yer tutmağımıza mane olur. Dörd ardıcıl məğlubiyyət bütün planlarımızı korladı. Artıq qrupdan çıxmaq şanslarımız heçə enib. Amma yeni baş məşqçinin gəlişindən sonra komandada tam fərqli atmosferin hökm sürməsi sevindirməyə bilməz. Motivasiya da tam fərqlidir. Bu tempdə də davam etməyimiz lazımdır. Qalan oyunlarda da uğur qazanmaq istəyirik.
- Amma qarşıda sizi qrupun lideri İtaliya ilə ev və Bolqarıstanla səfər oyunları gözləyir...
- Son oyunlarımız daha çətin olacaq. Amma diqqətli və dəqiq oynasaq, istənilən rəqibdən xal ala bilərik. Seçmə mərhələni uğurlu şəkildə başa vurmaq istəyirik.
