Nika Kvekveskiri: İnterin konkret hədəfi olmasa da, avrokuboklara vəsiqə qazanmaq istəyirik

"İnter"in yarımmüdafiəçisi Nika Kvekveskirinin azerisport.az saytına müsahibəsi

- Yeni mövsümün ilk üç turundakı çıxışınızla bağlı nə deyə bilərsiniz?
- Fikrimcə, "İnter" xüsusilə son iki turda çox yaxşı oynadı. İlk turda "Xəzər Lənkəran"a məğlub olmağımızın obyektiv səbəbləri var idi. Ona görə də yaxşı oynaya bilmədik. Amma "Neftçi" üzərində qələbə qazandığımız oyunda çox yaxşı çıxış etdik. "Zirə" ilə oyunda da ələ düşən şanslardan yararlana bilsəydik, qalib gələ bilərdik. Qarşıdakı oyunlarda daha da artıracağımıza əminəm.

- Ən çox hansı oyunda çətinliklə üzləşdiniz?
- Əlbəttə, "Xəzər Lənkəran"la oyunda. Çünki həmin görüşə yorğun çıxmışdıq. Həm də "Xəzər Lənkəran" çox yaxşı mübarizə apardı.

- Azərbaycan Premyer Liqasında oynamaq çətindr?
- Burada bütün oyunlar çətin keçir. Azərbaycan klublarının hamısı sonadək mübarizə aparırlar. Hələlik, hər şey xoşuma gəlir. İnanıram ki, gələcəkdə daha da yaxşı olacaq.

- Üç turdan sonra 4 xalla beşinci yerdə gedirsiniz. Bu, sizi qane edir?
- Heç kim qarşımıza konkret vəzifə qoymayıb. Amma şübhəsiz ki, biz daha artığına nail olmaq istəyirik. Bunun üçün əlimizdən gələni edirik. Yenidən avrokuboklara vəsiqə qazanmağa çalışacağıq. Çox çətin olacaq. Lakin mübarizəmizi sonadək davam etdirəcəyik.

- Konkret hədəfi olmayan klubda oynamaq darıxdırıcı deyil?
- Mənim üçün hər oyunda hədəf var: komandama kömək etmək, məşqçilərin, komanda yoldaşlarımın etimadını doğrultmaq. Həm də hər oyunda qələbə qazanmağımızı istəyirəm.

- "İnter" çempionluq uğrunda mübarizə apara bilər?
- Bu sual mənim özümə də çox maraqlıdır (gülür). Oynayacağıq. Nəyin necə başa çatacağını isə zaman göstərəcək. Yeri gəlmişkən, "Qarabağ"la "Qəbələ"ni Avropa Liqasının qrup mərhələsinə vəsiqə qazanmaları münasibətilə təbrik edirəm. Bu, Azərbaycan futbolu üçün çox mühüm uğurdur.