Bilal Sezər: Almaniyaya qarşı daha yaxşı oynayacağımıza inanıram
Azərbaycanın U-21 yığmasının və Almaniyanın "Borussiya" (Münhenqladbax) klubunun yarımmüdafiəçisi Bilal Sezərin azerisport.az saytına müsahibəsi
- Gənclərdən ibarət yığmamızın AÇ-2017-nin seçmə mərhələsi çərçivəsində Avstriyaya ev oyununda uduzmasına nə səbəb oldu?
- Məncə, məğlubiyyətə səbəb pis oynamağımız oldu. Qol vura bilmədik. Ələ düşən qol vəziyyətlərindən yararlana bilməyəndə Avstriya kimi texnikalı komandaya məğlubiyyət qaçılmaz olacaq. Onlar iki əks-hücum təşkil etdilər, hər ikisində də qol vurdular. Biz isə qol vurmağı bacarmadıq. Avstriya yığması zəif rəqib deyil.
- Oyunçular hətta adi ötürmələr zamanı da səhvlərə yol verirdilər. Sanki yığmamız bu oyuna heç hazır deyildi...
- Matçın əvvəlində pis oynamırdıq. Ötürmələr də dəqiq idi. Sadəcə, konsentrasiya yaxşı səviyyədə deyildi. Avstriya kimi rəqiblə görüşdə belə səhvə yol vermək olmazdı. Amma yaxşı köklənə bilmədiyimizə görə də uduzduq.
- Avstriyalılar da almanca danışırlar. Siz bu dili bilirsiniz. Onlar oyunun gedişində bizim futbolçulara nəsə deyirdilər...
- Xeyr, heç nə danışmırdılar. Oyundan sonra onların baş məşqçisi ilə danışdım. O, bizim pis onamadığımızı söylədi.
- Avstriya ilə bacarmadıq, qarşıda isə daha güclü Almaniya ilə ev oyunu var...
- Almaniya yığmasında daha güclü və təcrübəli futbolçular ççıxış edir. Onların arasında Bundesliqada çıxış edənlər də var. Daha diqqətli olmalıyıq, oyuna daha yaxşı köklənməliyik. Allag eləsin ki, yaxşı nəticə qazanaq.
- Sizə elə gəlmir ki, Avstiyaya 2 cavabsız qolla uduzan komanda Almaniyaya daha böyük hesabla məğlub ola bilər?
- Xeyr, özümüzə inanırıq. Avstriyaya qarşı pis oynadıq. Amma Almaniyaya qarşı yaxşı oynayacağımıza inanıram.
- "Borussiya"da işləriniz necə gedir? Nə vaxt əsas komandaya düşəcəksiniz?
- Klubla iki illik müqaviləm var. Əsas komanda ilə məşqlərə çıxıram. Amma orada daha təcrübəli futbolçular var. Ona görə də hələ əsas komandada oynamaq şansım azdır.
- Bəs əsas millimizin baş məşqçisi Robert Prosineçki ilə danışığınız olmayıb:
- Xeyr, onunla görüşməmişəm. Amma öz oyunumla Prosineçkinin diqqətini çəkmək istəyirəm.
- Azərbaycan yığmasını seçdiyinizə görə təəssüflənmirsiniz?
- Xeyr. Heç nəyə görə təəssüflənmirəm.
