Zaur Həşimov: Maltaya həm evdə, həm də səfərdə uduzduğumuz dövrlər var idi

Azərbaycan yığmasının sabiq müdafiəçisi Zaur Həşimov millimizin AÇ-2016-nın seçmə mərhələsi çərçivəsində Maltaya qarşı keçirdiyi oyunu şərh edib. Azerisport.az saytına açıqlamasında o, 2:2 hesabıyla bitən matçla bağlı bunları söyləyib:

"Uşaqların hamısı yaxşı oynadı. Təəssüf ki, 8 xal toplaya bilmədik. Halbuki, qələbəyə çox yaxın idik. Oyun sonadək yığmamızın diqtəsi altında keçdi. Bu, Bolqarıstana çatmaq üçün əla şans idi. Qol şanslarından yararlana bilsəydik, hesab tamamilə fərqli olacaqdı. Amma mən yenə də millimizi gözəl oyun münasibəti ilə təbrik etmək istərdim. Uşaqlar sonadək mübarizə apardılar, çox hücum etdilər. Unutmayaq ki, bizim Maltaya da həm evdə, həm də səfərdə uduzduğumuz vaxltar var idi. Amma bu gün yığmamz tamamilə başqa komandadır".