Rəşad Sadıqov: Maltaya qalib gələ bilərik

Azərbaycan yığmasının yarımmüdafiəçisi Rəşad Sadiqovun azerisport.az saytına müsahibəsi

- Xorvatiya ilə seçmə mərhələ çərçivəsindəki qolsuz heç-heçə ilə bağlı nə deyə bilərsiniz?
- Oyun doğrudan da çox çətin oldu. Osiyekdəki ilk oyunda 0:6 hesablı məğlubiyyətdən sonra bir qədər hirsli idik və revanş almaq istəyirdik. Bu komanda ilə ev oyununda heç-heçə də uğurlu nəticə sayıla bilər.

- Siz meydana ikinci hissədə çıxdınız. Robert Prosineçki sizə hansı tapşırığı vermişdi?
- Yaxşı baş məşqçimiz var. O, hər futbolçuya ürək-dirək verir. Oyundan öncə bizə demişdi ki, Azərbaycan yığması Xorvatiyadan zəif deyil. Mənə isə meydana çıxarkən hansı mövqedə oynamalı olduğumu tapşırdı. Mən də elə etdim.

- Bəs oyundan sonra nə dedi?
- Mənə də təşəkkür etdi. Yəqin ki, pis oynamamışdım. Komanda da yaxşı çıxış etdi.

- Xorvatiya ilə oyunun nəticəsi Malta ilə görüşə nə dərəcədə təsir göstərəcək?
- Allah eləsin ki, ancaq müsbət təsiri olsun. Komandamız artıq üç oyundur ki, uduzmur. Üstəlik, qapımızdan qol da buraxmırıq. Fikrimcə, belə oyun və motivasiya ilə Maltaya qalib gələ bilərik.

- Rövnəq Abdullayev oyundan sonra nə dedi?
- Bizi təbrik etdi. Onu da dedi ki, Osiyekdəki məğlubiyyətin əvəzini çıxa bilməsək də, bu heç-heçəyə görə sevinclidir.

- Mükafatın məbləğini söylədi?
- Xeyr. Bizi hələ Malta ilə oyun gözləyir. Belə qısa müddətdə heç kimə mükafat verilmir. Sonra necə olacağını bilmirəm. Bizim işimiz futbol oynamaqdır.