Rahid Əmirquliyev: Malta ilə oyunda hər şey ola bilər

Azərbaycan yığmasının yarımmüdafiəçisi Rahid Əmirquliyevin azerisport.az saytına müsahibəsi

- Xorvatiya ilə seçmə mərhələ oyunundan (0:0) sonra özünüzü necə hiss edirsiniz?
- Bu oyuna görə bir qədər təəssüflənirəm. Çünki mənə elə gəlir ki, biz daha yaxşı oynaya bilərdik. Qonaqların qol vurmaq üçün daha çox şansları oldu. Bütövlükdə, onlar qələbəyə daha çox yaxın idilər.

- Millimizin hücum xəttindəki oyunu niyə alınmırdı?
- Top saxlaya bilmirdik. Bunu aradan qaldırmaq lazımdır. Gələcəkdə bu yöndə müsbət dəyişikliklərin olacağına əminəm.

- Malta ilə səfər oyunu öncəsi xorvatlarla heç-heçə atmosferə müsbət təsir edəcəkmi?
- Şübhəsiz ki, Maltaya yüksək əhval-ruhiyyədə gəlmişik. Amma Malta ilə oyun Xorvatiya ilə görüşdən asan olmayacaq. Ümumiyyətlə, xorvatlarla görüşü unudub, tam olaraq Malta ilə matça köklənməliyik.

- Klubla Malta təmsilçisinə qarşı mübarizə aparmasınız. Bu ölkədə oynamaq necədir?
- Bəli, "Xəzər Lənkəran"ın heyətində "Slima" ilə qarşılaşmışdıq. Bizi bu dəfə daha aqressiv kollektiv gözləyir. Malta yığmasının hətta Bakıdakı görüşdə də qol vurmaq şansları var idi. İndi onların doğma meydanda nələr edəcəyini təsəvvürünüzə gətirin.

- Biz niyə?
- Biz daha yaxşı futbol sərgiləməyə hazırıq. Səfərdən üç xalla qayıtmağa çalışacağıq. Amma Malta ilə görüşdə istənilən nəticə qeydə alına bilər. Hər şey mümkündür.

- Norveç səfərdə Bolqarıstana qalib gəlməklə üçüncü pilləni tutmaq yolunda önəmli addım atdı...
- Norveçlilər demək olar ki, üçüncü yeri özlərinə təmin ediblər. Bizə yalnız qarşıdakı oyunlarda maksimum xal toplamaq qalır ki, dördüncü pilləyə yüksələk. Bu tempdə davam etsək, buna nail olacağıq. Tsiklə necə başladığımızı nəzərə alsaq, dördüncü yeri tutmağımız yaxşı nəticə sayılacaq.