Elxan Abdullayev: Malta ilə oyuna görə Xorvatiya ilə matçı qurban verməyəcəyik

Azərbaycan yığmasının məşqçisi Elxan Abdullayevin azerisport.az saytına müsahibəsi

- Yığmamız AÇ-2016-nın seçmə mərhələsi çərçivəsində Xorvatiya və Malta ilə oyunların hazırlığına avqustun 24-dən start versə də, əksər aparıcı futbolçular toplanışın son günlərində düşərgəyə qoşuldular. Bu, millimizin yaxşı hazırlaşmasına mane olmadı?
- FİFA-nın müəyyən qaydaları var ki, onlara əməl etməyə borcluyuq. İstəsək də, istəməsək də, bu vəziyyətlə barışmalıyıq.

- Millinin Malta ilə oyunda 3 xal qazanmaq istədiyi heç kimə sirr deyil. Amma Bakıda Xorvatiyaya qarşı ilk oyun millidən çox güc alacaq. Bunu nəzərə alsaq, məşqçilər korpusunun hansı planları var?
- Biz indi Malta ilə oyunu düşünə bilmərik. Buna görə Xorvatiya ilə oyunu qurban vermək də olmaz. Hazırda ancaq Xorvatiya ilə oyunu düşünürük. Ondan sonra Malta ilə matçı düşünmək üçün üç gün vaxtımız olacaq.

- Robert Prosineçki üçün Xorvatiya ilə oyun prinsipial xarakter daşıyır?
- O, peşəkardır. Prosineçki üçün kimə qarşı oynamağın fərqi yoxdur. Bütün rəqiblər eynidir. Hər bir oyunda da məqsəd qələbə, uğur qazanmaqdır. Təbii ki, rəqibimiz Avropanın ən güclü kollektivlərindən biridir və ona ciddi yanaşırıq. Amma hansısa prinsipiallıqdan söhbət gedə bilməz.

- Xorvatiya ilə oyunun "Bakcell Arena"da keçirilməsini doğrudan da Prosineçki özü istəyib?
- Mənim bundan xəbərim yoxdur. Amma təbii ki, bu arena azarkeşlər tərəfindən daha tez və tam doldurulması baxımından əlverişli variantdır. Əsl futbol arenasında oynamaq oyunçular üçün də xoş olur.

- Xorvatların Modriç və Rakitiç kimi aparıcı futbolçularını dayandırmaq üçün hansı planlarınız var?
- Bizim öz düşüncələrimiz var. Amma bu haqda danışa bilmərəm.

- Vaqif Cavadovun "Xəzər Lənkəran"da debüt etmədən "Qəbələ"yə keçməsini necə qarşıladınız?
- Əgər ona bu klubda oynamaq komfortlu olacaqsa, o, "Qəbələ"yə keçməyi lazımlı bilibsə, uğurlar arzulayıram. Fikrimcə, bu komandada yaxşı oyun sərgiləyə bilsə, yığma komandaya da qayıda bilər.