Ruslan Qurbanov: Millinin iki oyuna 4 xal qazanması çox böyük uğur olacaq

Azərbaycan yığmasının və "Neftçi"nin hücumçusu Ruslan Qurbanovun azerisport.az saytına müsahibəsi

- Xorvatiya ilə seçmə mərhələ oyununa hazırlıq necə gedir?
- Məşqlərimiz yaxşı keçir. Hər kəs məşqlərdə maksimum güclə çalışır ki, qarşıdakı iki oyuna tam hazır olaq. Xorvatiya ilə oyunu səbrsizliklə gözləyirik.

- Bu oyunda yığmamızdan nə gözləyə bilərik?
- Hamımız ancaq uğurlu nəticə gözləyirik. Xorvatlara qarşı oynamaq çox çətin olacaq. Amma Robert Prosineçkinin bizdən tələb etdiyi kimi oynamağı bacarsaq, xorvatlara problem yarada bilər.

- Xorvatiya kimi güclü rəqibdən xal almaq üçün nə etmək lazımdır?
- Öz üzərimizdə daha çox çalışmalıyıq.

- Bu matçda qələbə qazanmağınız möcüzəyə bərabər sayıla bilər?
- Əlbəttə, qələbə qazanmaq əla nəticə olardı. Amma hamı bilir ki, Xorvatiya yığmasında hansı dünya ulduzları top qovur. Lakin biz bundan qorxmamalıyıq. 90 dəqiqə ərzində rəqibə layiqli müqavimət göstərməyimiz lazımdır. Yalnız belə olan halda uğurlu nəticə qazana bilərik.

- Modriçə, Rakitiçə, Mandjukiçə qarşı oynamaq çətin olmayacaq ki?
- Onlar da bizim kimi insanlardır. Düzdür, onlar top-klublarda çıxış edirlər. Amma biz Xorvatiyadan çəkinmirik.

- Yığmamız Bakıda da böyük hesabla məğlub olsa, buna nə ad vermək olar?
- Oxşar uğursuzluqla üzləşməmək üçün əlimizdən gələni edəcəyik. Öz azarkeşlərimiz qarşısında oynamağımız bizə əlavə özünəinam qazandıracaq. Əminəm ki, fanatlarımız bizi sonadək dəstəkləyəcəklər. Biz isə xalqımızı uğurlu nəticə ilə sevindirməyə çalışacağıq.

- Malta ilə oyunda 3 xal qazanmaq mümkün olacaq?
- Hələ ki, ancaq Xorvatiya ilə oyunu düşünürük. Malta ilə görüşü yalnız bu oyundan sonra düşünəcəyik. Amma indidən əminliklə demək olar ki, səfərdə Maltadan 3 xal almaq çox çətin olacaq.

- İki oyunda 4 xal qazana bilsək, bunu uğurlu nəticə saymaq olar?
- Əlbəttə, bu, çox böyük uğur olacaq. İnanın ki, Azərbaycan xalqını sevindirmək üçün əlimizdən gələni edəcəyik.