Niko Kovaç: Azərbaycan yığması indi daha güclüdür

Xorvatiya yığmasının baş məşqçisi Niko Kovaç AÇ-2016-nın seçmə mərhələsi çərçivəsində Azərbaycan yığmasına qarşı keçirəcəkləri səfər oyunu öncəsi fikirlərini açıqlayıb. Azerisport.az xəbər verir ki, o, bunları söyləyib:

"Səfər matçı bu komandalar arasında Osiyekdə keçirilmiş oyundan tam fərqli olacaq. Robert Prosineçki komandasında demək olar ki, hər şeyi dəyişib. Azərbaycan yığması indi daha güclüdr. Bizi 30-35 dərəcə isti havada çətin oyun gözləyir. Azərbaycanın iki klubunun eyni vaxtda Avropa Liqasının qrup mərhələsinə yüksəlməsi də onlarda müsbət tendensiyanın formalaşmasından xəbər verir. Amma biz də optimistliyimizi itirmirik və qələbəyə ümid edirik".

Kovaç öz komandasının heyəti barədə də fikirlərini bildirib: "Deyan Lovren ağrılardan şikayətlənir. Amma onun meydana çıxacağına ümid edirəm. Əslində məni narahat edən başqa bir məqam var. Heyətimizdə yaxşı oyunçuların sayı yetərincədir. Bu üzdən də mənə daha yaxşı formada olan futbolçular arasında düzgün seçim etmək lazımdır".

Xorvatiya yığması avqustun 30-da bir araya gəlsə də, Kovaç hazırlıq üçün bu vaxtın yetərli olacağını deyib: "Toplanışın ilk günündən etibarən hər gün məşq edirik. Həmçinin bizi Bakıda da son məşq gözləyir".

Xorvatiyalı mütəxəssis həmçinin həmyerlisi Robert Prosineçki ilə görüşə də toxunub: "Bu, mənimlə Prosineçki arasındakı qarşılaşma deyil. Mən bu görüşə fərqli aspektdən yanaşıram. Bizi qarşıda iki çətin oyun gözləyir. Bu oyunlarda mütləq xal qazanmağa çalışmalıyıq ki, sonda Fransaya yollanaq".