Vaqif Cavadov: Ümidvaram ki, XL azarkeşləri məni başa düşər
"Qəbələ"nin "Xəzər Lənkəran"dan icarəyə götürdüyü Vaqif Cavadovun azerisport.az saytına müsahibəsi
- "Qəbələ"yə keçidiniz çox gözlənilməz alındı...
- Hər şey çox ani baş verdi. Demək olar ki, transferim 1-2 günün içində gerçəkləşdi. Buna bir tərəfdən sevinirəm. Lakin digər tərəfdən də mən "Xəzər Lənkəran"dakı ilk rəsmi matçıma hazırlaşırdım. Düzdür, "Qəbələ"yə keçmək məsələsi gündəmə gələrkən, bunun əleyhinə də olmadım. Sadəcə, klublar razılığa gəldilər, mən də imtina etmədim.
- "Qəbələ"yə keçidinizdə əsas amil yeni klubunuzun "Xəzər Lənkəran"dan fərqli Avroliqanın qrup mərhələsində oynamasıdır?
- Əsas məqam bu klubun məni öz sıralarında görmək istəməsi idi. Həm də Avroliqanın qrup mərhələsində oynamağa hazırlaşan klubun heyətində olmaq da mənə maraqlı gəldi. "Qəbələ"nin bu mövsüm çempionluğa oynamaq istəməsi də əlavə stimul verir. Ümid edirəm ki, bu kluba keçdiyim üçün "Xəzər Lənkəran" azarkeşləri məni başa düşər.
- Vaqif Cavadov yeni klubuna nə ilə kömək etməyi düşünür?
- Əlimdən gələn qədər kömək etməyə çalışacağam. Komanda artıq uğur qazanıb. Mən də bu uğuru daha da inkişaf etdirmək üçün çalışacağam. Üzərimdə çox çalışacağam və ümid edirəm ki, komandaya qrup mərhələsində, eləcə də çempionat oyunlarında faydalı olacağam.
- Dörd ay sonra müqavilə müddətiniz bitəndən sonra nə edəcəksiniz?
- Zaman göstərəcək. Hələ ki, qışa qədər buradayam. Hələ ilin sonunadək yaşayaq, sonrasını görərik (gülür).
- "Qəbələ" qrup mərhələsində Almaniyanın "Borussiya" (Dortmund), Rusiyanın "Krasnodar" və Yunanıstanın PAOK klubları ilə qarşılaşacaq...
- Maraqlı qrupa düşmüşük. Yaxşı komandalara qarşı oynamaq həmişə xoşdur. Amma püşk "Qəbələ" üçün daha münasib alına bilərdi. Yaxşı hazırlaşmağımız lazımdır. Hər oyunda maksimum güc sərf etməyimiz lazımdır. Hansı ki, komanda əvvəlki mərhələlərdə bunu edirdi. Bütün oyunlar maraqlı keçəcək.
- Henrix Mxitaryan məsələsi ilə bağlı nə düşünürsünüz?
- Əgər o, Azərbaycan Respublikasının qanunlarını pozubsa, ölkəmizdə nə işi var?
- Azərbaycan yığmasının AÇ-2016-nın seçmə mərhələsi çərçivəsində Xorvatiya və Maltaya qarşı keçirəcəyi oyunlar üçün açıqlanan siyahıda adınızın olmaması sizi üzmədi?
- Mən yığmaya çağırılmağıma həmişə sevinmişəm. Bəzən məndən imtina etsələr də, mən heç vaxt yığmamızdan imtina etməmişəm. Hər şeyə rəğmən, ürəyim uşaqlarladır. Onlara uğurlar arzulayıram. Yığmamızı iki çətin oyun gözləyir. Xorvatiyanın gücünü bütün dünya bilir. Maltaya gəlincə, onlar da öz meydanlarında yaxşı çıxış edirlər. Asan olmayacaq. Amma biz yığmamızın uğur qazanmasına azarkeşlik edəcəyik.
