Vəli Qasımov: Braziliyada futbolçular çox bahadırlar, amma gözaltı etdiklərimiz var
"Neftçi"nin idman direktoru Vəli Qasımovun azerisport.az saytına müsahibəsi
- Cənubi Amerikaya səfəriniz necə keçdi?
- Yaxşı səfər oldu. Ondan çox oyuna baxdıq. Braziliya və Paraqvayda baxdığımız oyunların bu qədər yüksək səviyyədə keçəcəyini gözləmirdim. Onlardan öyrənəcəyimiz çox şey var. Səfərin nəticəsi olaraq, böyük ehtimalla Braziliyanın "Fluminense" klubu ilə əməkdaşlıq müqaviləsi imzalayacağıq.
- Bu əməkdaşlıq sizə nə verəcək?
- Braziliya klubunun nümayəndələri təxminən oktyabr ayında bizə qonaq gələcəklər. Əməkdaşlığın qalan detallarını hələ müzakirə edəcəyik. Uşaq futboluna xüsusi önəm veririk. Biz öz yetirmələrimizi oraya göndərəcəyik.
- Gözaltı etdiyiniz futbolçular var?
- İndi kimisə dəvət etməyimiz çətindir. Çünki mövsümün qızğın vaxtıdır. Orada futbolçular çox bahadırlar. Oyunçular həddən artıq bahadırlar, amma onların buna dəydiyini də demək lazımdır. Bir neçə oyunçunu gözaltı etmişik. Lakin bu məsələyə bir də dekabr ayında qayıdacağıq. İlin sonunda kimisə dəvət etmək daha asan olacaq.
- Bu gün transfer pəncərəsi bağlanır. Yeni transferiniz olacaq?
- Ümid edirəm ki, hə. Bir transferlə bağlı iş gedir. Hazırda danışıqlar davam etdirilir. Amma onun kim olduğunu deyə bilmərəm.
- Üç turdan sonra "Neftçi"nin altıncı yerdə olacağını gözləyirdiniz?
- Biz hazırda təkcə nəticələri yaxşılaşdırmaq yox, həm də oyunumuzu yaxşılaşdırmaq üçün çalışırıq. Xal itirdiyimiz oyunlarda komandamız istədiyimiz kimi çıxış etmədi. Amma "Sumqayıt"la oyun göstərdi ki, biz düzgün yoldayıq. Ümid bəslədiyimiz futbolçular ümidləri doğruldurlar. Nəticə də olacaq.
- Düşünmürsünüz ki, "Neftçi" bu mövsüm ürəkaçan nəticə qazanmağa layiq futbol sərgiləmir?
- Yeni komanda yaratmaq, dərhal nəticə qazanmaq mümkün deyil. Şübhəsiz ki, biz də nəticə qazanmağı çox istəyirik. Amma ən vacibi yaxşı komanda yaratmaq, yaxşı oyun sərgiləməkdir. Ondan sonra nəticə də olacaq.
- Nəticəyə görə baş məşqçi cavabdeh olur. Samir Əliyevdən razısınız?
- İradım yoxdur. Hər şey plan üzrə gedir və normaldır. Biz də müsbət və mənfi məqamları müzakirə edirik, problemlərin həllinə çalışırıq.
