Xorvatiya və Malta matçı öncəsi 25 oyunçudan dördü fərqləndi
Azərbaycan yığma komandasını qarşıdakı günlərdə AÇ-2016-nın seçmə mərhələsi çərçivəsində Xorvatiya və Malta ilə oyunlar gözləyir. Azerisport.az sizi bu oyunlara dəvət alan futbolçularımızın klublarında keçirdiyi son oyunlardakı göstəriciləri ilə tanış edir.
Qapıçılar
Kamran Ağayev Türkiyə PTT 1-ci liqasının son turunda "Karşıyaka"nın heyətində "Samsunspor"a qarşı (2:2) 90 dəqiqə mübariz aparıb və iki qol buraxıb. Millimizin qolkiperinin buraxdığı qollardan biri penaltidən olub. Aqil Məmmədov "Neftçi"nin heyətində "Sumqayıt"a qarşı oyunda sonadək mübarizə aparıb və bir qol buraxıb (2:1). "İnter"də çıxış edən Səlahət Ağayev isə "Zirə" ilə görüşdə 90 dəqiqə mübarizə aparıb və qapısını toxunulmaz saxlamağı bacarıb - 0:0.
Müdafiəçilər
Tərlan Quliyev ("Kəpəz") və Məhəmməd Mirzəbəyov ("Qəbələ") Topaz Premyer Liqasının 3-cü turunda bu iki klubun duelində (0:1) üz-üzə gəliblər və 90 dəqiqə oynayıblar. "Qəbələ"nin millidəki digər müdafiəçisi Arif Daşdəmirov isə Afinada Avroliqanın pley-off mərhələsi çərçivəsində Yunanıstan "Panatinaikos"una qarşı səfər matçında 90 dəqiqə meydanda olub. Komandası 2:2 hesablı bərabərlik nəticəsində tarix yazaraq, ilk dəfə qrup mərhələsinə vəsiqə qazanıb.
Ruslan Abışov "Xəzər Lənkəran"a keçəndən bəri məlum səbəblərdən hələ də meydana çıxmayıb. Pavel Paşayev Zaporojye "Metallurq"unun heyətində Donetsk "Şaxtyor"una qarşı 90 dəqiqə mübarizə aparıb, komandası 0:2 hesabıyla uduzub.
Bədavi Hüseynovla Rəşad Sadıqov Avroliqanın pley-off mərhələsi çərçivəsində İsveçrənin "Yanq Boyz" klubuna qarşı cavab matçında (3:0) 90 dəqiqə meydanda olublar.
Yarımmüdafiəçilər
Rəşad Sadiqovla Elvin Camalov Afinada keçirilmiş "Panatinaikos" - "Qəbələ" matçının iştirakçısı olub. Rəşad 90, Elvin 86 dəqiqə mübarizə aparıb.
Qara Qarayev, Cavid Tağıyev, Coşqun Diniyev və Əfran İsmayılov da "Qarabağ" - "Yanq Boyz" görüşündə meydanda olublar. Qarayev 86, İsmayılov 72 dəqiqə meydanda olubsa, Diniyev 78-ci dəqiqədə Tağıyevin əvəzində meydana çıxıb. Əfran bu görüşdə vurulan üçüncü qolun müəllifi olub.
Araz Abdullayev ("Neftçi") son turda "Sumqayıt"a qarşı 90 dəqiqə oynayıb və qolla yadda qalıb. Belə bir göstəriciyə Rahid Əmirquliyev də ("Xəzər Lənkəran") "Rəvan"la ev oyununda imza atıb (1:1).
Dmitri Nazarov Almaniya ikinci Bundesliqasının son turunda Braunşveyq "Ayntraxt"ının onun komandasını - "Karlsrue"ni necə darmadağın etməsinə (0:6) ehtiyat oyunçular skamyasından tamaşa edib. Eddi İsrafilov da İspaniya La Liqasında "Eybar"ın Bilbao "Atletik"inə qalib gəldiyi (2:0) oyunda ehtiyatda qalıb.
Hücumçular
Ruslan Qurbanovla Məhəmməd Qurbanov "Neftçi"nin "Sumqayıt"a qarşı oynadığı matçın iştirakçısı olub. Ruslan qol vurmağa imkan tapıb, 62-ci dəqiqədə əvəzlənibsə, Məhəmməd sonadək mübarizə aparıb.
"Xəzər Lənkəran"ın hücumçusu Elnur Cəfərov da "Rəvan"a qarşı 90 dəqiqə oynayıb. Bu klubun digər hücumçusu Vüqar Nadirov isə Ruslan Abışov kimi, oynamaq şansı qazana bilmir.
Nəhayət, "İnter"in hücumçusu Rauf Əliyev "Zirə"yə qarşı 90 dəqiqə oynasa da, qol vura bilməyib.
Beləliklə, millimizin heyətində yer alan 25 futbolçudan son oyunda qol vurmağı yalnız dördü bacarıb. Bunlar Əfran İsmayılov, Araz Abdullayev, Rahid Əmirquliyev və Ruslan Qurbanovdur.
