Səlahət Ağayev: Xorvatların Bakıda bizə altı qol vuracağını düşünmürəm
Azərbaycan yığmasının və "İnter"in qapıçısı Səlahət Ağayevin azerisport.az saytına müsahibəsi
- Millinin toplanışı necə keçir?
- Hər şey yaxşıdır. Toplanışın ilk günlərində az futbolçu iştirak edirdi. Bu da Avropa Liqasında çıxış edən "Qarabağ"la "Qəbələ"nin futbolçularının düşərgəyə qoşulmamasından irəli gəlirdi. Üstəlik, legionerlər də bizə qoşulmamışdı. Zədə səbəbindən yığmanın toplanışını buraxmışdım. Şadam ki, yenidən milliyə qayıtmışam. Bu, həm də mənim Robert Prosineçkinin rəhbərliyi altında ilk toplanışımdır.
- Onun rəhbərliyi altında məşq etmək necədir?
- Necə qarşılandığım nəzərə alsaq, yeni baş məşqçi ilə komandada hər şey yaxşıdır. Atmosfer kifayət qədər yaxşı nəticələrə ümid etməyə də əsas verir.
- Siz də yaxşı formadasınız, Kamran Ağayev də. Sizcə, Xorvatiya ilə seçmə mərhələ oyununda hansınıza üstünlük veriləcək?
- Çətin ki, Prosineçkidən başqa buna dəqiq cavab verən tapılsın. Şübhəsiz ki, Xorvatiyaya qarşı oynamağı mən də çox istəyirəm. Məşqlərdə də bunun üçün çox çalışıram. Özümü mümkün qədər yaxşı tərəfdən göstərməyə çalışıram.
- Xorvatlar Bakıya çox güclü heyətlə gəlirlər. Altı qol buraxmaq arzusundasınız?
- (gülür) Onların Bakıda da bizə o qədər qol vuracağını düşünmürəm. Həm də millimiz artıq ötən tsikldəki komanda deyil. Rəqib də bunu yaxşı başa düşür. Qapıda hansımız dursa, layiqincə çıxış etməyə çalışacağıq.
- Elə isə, neçə qol buraxacağıq?
- Əsas altı qol buraxmamaqdır (gülür). Amma ciddi olsaq, son oyunlar Azərbaycan yığmsının yüksəlişdə olduğunu göstərdi. Əlbəttə, Xorvatiya Malta və ya Norveç deyil. Amma öz meydanımızda onlarla da mübarizə apara bilərik. Baxmayaraq ki, rəqibin heyətində yüksək səviyyəli futbolçular var və bizə çox çətin olacaq.
- "İnter"də işləriniz necə gedir?
- Bir müddət öncə yeni müqaviləyə əsasən maaşlarımızı aldıq. Büdcə və maaşlarımız artıq əvvəlki kimi deyil. Amma maliyyə durumunun sabitləşməsi sevindirməyə bilməz.
- "İnter" bu büdcə ilə yeni mövsümdə nəyə ümid edir?
- Büdcəmizin az olmasına baxmayaraq, yaxşı heyətimiz var. Biz avrokuboklara vəsiqə qazanmaq uğrunda mübarizə apara bilərik. Kollektivimiz buna nail olacaq gücdədir.
- Yeni mövsümə startınızı necə qiymətləndirə bilərsinz?
- İlk turda "Xəzər Lənkəran"a məğlubiyyəti nəzərə almasaq, vəziyyət heç də acınacaqlı deyil. 4 xal toplamışıq. Bu da üç tur üçün pis nəticə sayılmamalıdır. Belə oynamağa davam etsək, Avroliqaya vəsiqə qazana bilərik.
