Aslan Kərimov: Ola bilər ki, Prosineçki Novruzovu jurnalistləri razı salmaq üçün milliyə dəvət edib

Azərbaycan yığmasının sabiq kapitanı Aslan Kərimov "Qarabağ"la "Qəbələ"nin Avropa Liqasının pley-off mərhələsi çərçivəsində müvafiq olaraq İsveçrə "Yanq Boyz"unu və Yunanıstan "Panatinaikos"unu keçmək şanslarını dəyərləndirib. Azerisport.az saytına müsahibəsində o, öncə bunları söyləyib:

- "Qəbələ" ilə oyunda daha güclü "Panatinaikos" gözləyirdim. Amma komandamız həmin oyunda yaxşı çıxış etdi. Bir neçə qol vəziyyəti də oldu, sadəcə, qalib gələ bilmədi. Pis nəticə deyil. Səfərdə vurulacaq bir qol növbəti mərhələyə vəsiqə gətirə bilər. Lakin "Qəbələ" üçün çox böyük bir çatışmazlıq var.

- Hansı?
- Bu, Yunanıstan klubunun ev oyununda daha güclü oyun sərgiləməsidir. Bu dəfə biz tam fərqli "Panatinaikos" görəcəyik. Daha aqressiv çıxış edəcəklər. Fanatlarının necə çılğın olduğunu nəzərə alsaq, daha böyük çətinliklə üzləşəcəyik. Şanslara gəldikcə, 60-ın 40-a yunanların xeyrinədir. Lakin hər halda bu komanda vaxtilə Çempionlar Liqasında at oynadan vaxtlardakı kimi deyil.

- Bəs "Qarabağ"?
- "Qarabağ"ın indiki heyətinin ötən illərdəkindən zəif olduğuna dair fikirlərlə razı deyiləm. Sadəcə, yeni futbolçular komandaya tam uyğunlaşa bilməyiblər. Buna baxmayaraq, vəziyyət hər oyunda daha da yaxşılaşır. "Yanq Boyz" üzərində səfər qələbəsi üstünlük yaradıb. Lakin mənə elə gəlir ki, İsveçrə klubu Şotlandiya "Seltik"indən daha güclüdür. Bu komanda öz oyununa, hücum potensialına görə daha təhlükəli təsir bağışlayır. Sadəcə, rəqib komandanın baş məşqçisinin olmaması onların oyununa təsir etdi. Daha çox açıq oyun sərgilədilər.

- Ağdamlılara ev oyununda çətin olacaq?
- Rəqib buraya qədər gəlib çıxıbsa, deməli, sıradan komanda deyil. Səfərdə qazanılan qələbə hələ ümumi uğurdan xəbər vermir. Düzdür, üstünlüyümüz var, amma cavab matçı daha çətin keçəcək.

- Robert Prosineçki Azərbaycan yığmasına 30 futbolçu dəvət edib. Buna münasibətiniz necədir?
- Geniş heyətdir. Fikrimcə, xorvatiyalı mütəxəssis hazırda ən yaxşı formada olan futbolçulara dəvət göndərib. Heyətdə yeni və gənc futbolçular var. Bu, onlar üçün bir şansdır.

- Nurlan Novruzovun bu dəfə milliyə dəvət olunmaı sizə qəribə gəlmədi?
- (gülür) Onun "Bakı"da qollar vurarkən yox, məhz indi niyə çağırılmasının səbəbini deyə bilmərəm. Qarşıda iki çətin oyun var. Belə futbolçunun millinin heyətində olmasının nəyi pisdir ki? Məncə, bu jurnalistlərin də istəyinə uyğundr (gülür). Amma inanmıram ki, o, bu oyunlarda əsas heyətdə meydana çıxsın. Çünki Prosineçkinin məlum heyəti var və onlara güvənir. Novruzovu isə mümkündür ki, onu dəvət etmədiyinə görə tənqid edən jurnalistləri razı salmaq üçün milliyə dəvət edib. (gülür)