Vladislav Qədirov: Qəbələnin işi Qarabağla müqayisədə daha çətindir
"Rəvan"ın sabiq baş məşqçisi Vladislav Qədirov "Qarabağ"la "Qəbələ"nin Avropa Liqasının pley-off mərhələsi çərçivəsində müvafiq olaraq İsveçrə "Yanq Boyz"unu və Yunanıstan "Panatinaikos"unu keçmək şanslarını dəyərləndirib. Azerisport.az saytına açıqlamasında o, bunları söyləyib:
"Yanq Boyz" ilk oyunda mənim xoşuma gəldi. Amma mənə elə gəlir ki, bu rəqib "Qarabağ"ın dişinə görə rəqibdir. "Qəbələ"yə gəlincə, bu komandanı səfərdə ən çətin oyunlardan biri gözləyir. Afinada azarkeş amili böyük rol oynayacaq. Çox çətin olacaq. Lakin "Qarabağ"a da Bakıda asan olmayacaq. Əsas odur ki, rəqibləri düzgün qiymətləndirə bilək. Məsələn, ağdamlılar səfərdə qələbə qazandıqlarını və ev oyununda işlərinin asan olacağını düşünsələr, nəticəsi pis ola bilər. İsveçrəlilər səfərdə qələbə qazanmaq üçün qol vurmağa, tələsməyə çalışacaqlar. Onlara ehtiyatlı oyunla cavab vermək lazımdır. Hər iki oyunda meydan sahiblərin 70-in 30-a daha şanslıdır. Düzünü desək, "Qəbələ"nin işi "Qarabağ"la müqayisədə çox çətindir".
