Goergi Floresku: Panatinaikos səddini keçmək olar
"Qəbələ"nin yarımmüdafiəçisi Georgi Floresku Avropa Liqasının pley-off mərhələsi çərçivəsində Yunanıstan "Panatinaikos"u ilə səfər matçı öncəsi fikirlərini açıqlayıb. Azerisport.az saytına açıqlamasında o, bunları söyləyib:
"Matça hazırıq. Klubumuz üçün yeni tarix yazmaq istəyirik. Avroliqanın qrup mərhələsinə vəsiqə qazanmağımız əla olardı. "Panatinaikos" güclü komandadır. Amma bu, bizi qorxutmur. Bakıdakı ilk matçda futbolçularımız rəqibdən heç də zəif çıxış etmədilər. Meydana çıxandan sonra titulları unudursan. Fikrimcə, bu rəqibi keçmək olar. Bunun üçün ilk növbədə qol vurmalıyıq. Hücum xəttimiz kifayət qədər güclüdür. Hesabı açan tərəf biz olsaq, rəqib daha çox irəli atılacaq və bizim üçün boşluqlar yaradacaq. Bu isə uğur qazanmağımız üçün əlavə şans deməkdir. Ötən oyunda baş məşqçi mənə zədədən yeni qayıtdığım üçün risk etməməyi məsləhət gördü və oynamadım. Artıq tam sağalmışam, komanda ilə birgə məşq edirəm. Özümü yaxşı hiss edirəm. Baş məşqçi şans versə, komandama kömək etmək üçün əlimdən gələni əsirgəməyəcəyəm".
