Aleksey Qay: İlk matçın nəticəsi uğurlu sonluğa ümid verir
"Qəbələ"nin yarımmüdafiəçisi Aleksey Qay Avropa Liqasının pley-off mərhələsi çərçivəsində Yunanıstanın "Panatinaikos" klubuna qarşı keçirəcəkləri cavab matçı öncəsi azerisport.az saytının suallarını cavablandırıb.
- İlk oyundan bir həftə ötüb. Həmin maçtda yararlana bilmədiyiniz qol epizodlarına görə təəəssüflənirsiniz, ya hər şey sizin gözlədiyiniz kimi alındı?
- "Panatinaikos"la ilk oyunu "Kəpəz"lə matça qədər unutmuşduq. Həmin oyunu analiz etdik və bir kənara qoyduq.
- "Qəbələ"nin ilk oyunda qol buraxmaması nə qədər yaxşı olsa da, qol vura bilməməsi bir o qədər pisdir...
- İlk oyunun nəticəsinin bizim üçün nə dərəcədə sərfəli olduğunu cavab matçından sonra biləcəyik. Fikrimcə, ilk matçın nəticəsi bizim qrup mərhələsinə vəsiqə qazanmağımıza kömək edə bilər.
- İlk oyunda "Panatinaikos" sizin gözlədiyiniz kimi oynadı?
- Rəqibimiz yaxşı komandadır. Amma həmin oyun göstərdi ki, biz onlarla bərabər səviyyədə mübarizə apara bilərik.
- Yunanları keçə bilməsəniz, pley-offa qədər irəliləmək sizin üçün uğur sayıla bilər?
- İndi bu barədə danışmaq, düşünmək düzgün olmazdı. Daha yaxşı nəticələr haqda düşünmək lazımdır.
- Cavab matçı da ilk oyundakı kimi alınsa, əlavə vaxt olması istisna deyil...
- Bu barədə ümumiyyətlə düşünmürük. Baxmayaraq ki, bütövlükdə hər şeyə hazır olmaq lazımdır.
- Hətta penalti seriyasına da?
- Ən pis halda da yaxşı sonluğa ümid edirik. Mən əsas vaxtda qələbə qazanmağın tərəfdarıyam. Əlavə vaxt olacağı halda da oynayacağıq.
- Çılğınlığı ilə seçilən "Panatinaikos"un azarkeşləri qarşısında oynamaq sizə problem yaratmayacaq?
- Əksinə, belə bir futbol atmosferində oynayacağımız üçün sevinməliyik. Əlbəttə, mən hər kəsin yerinə cavab verə bilmərəm. Amma şəxsən mən belə isti atmosferdə oynamağı xoşlayıram.
