Kaue: Karyeramda ilk dəfə belə halla üzləşirəm
"Neftçi"nin yarımmüdafiəçisi Kaue Topaz Premyer Liqasının 3-cü turu çərçivəsində "Sumqayıt"a qarşı keçirilmiş oyundan (2:1) sonra azerisport.az saytının suallarını cavablandırıb.
- Oyun barədə nə deyə bilərsiniz?
- İki uğurlu əks-hücum təşkil etdik və qollar vurduq. Bundan əlavə də çoxlu qol epizodu yaratdıq. Amma onlardan yararlana bilmədik. Halbuki, daha çox qol vura bilərdik. Rəqib buraxılan toplardan birinin əvəzini çıxandan sonra çətinliyimiz yarandı. Bütövlükdə, maraqlı görüş idi.
- Birinci hissədə parlaq oyun sərgiləyə bilməməyiniz "Sumqayıt"dan asılı idi, ya istiyə görə?
- Erkən qol vursaydıq, oyun tam fəqli cərəyan edə bilərdi. Razıyam ki, biz birinci hissədə daha sürətli və fəal oynaya bilərdik.
- Aç-2016-nın seçmə oyunları ilə əlaqədar çempionatda yaranacaq fasilə sizin üçün nə dərəcədə faydalı ola bilər?
- Belə təcrübə mənim xoşuma gəlmir. Biz artıq sürət yığmışıq, amma indi belə bir fasilə ilə üz-üzəyik. Özü də qələbə qazandığımız oyundan sonra.
- Karyeranız ərzində başqa ölkələrdə belə bir halla üzləşməmisiniz?
- Yığmalara görə fasilə olurdu. Amma belə 20 günlük yox. Belə halla ilk dəfə rastlaşıram.
- "Neftçi"nin yeni qapıçı və hücumçu almasını necə qarşıladınız?
- Hücumçunu hələ görməmişəm. Amma qapıçı təcrübəlidir. Bizə qədər yaxşı klublarda oynayıb.
- Bu mövsüm qol vurmaqda çətinlik çəkirsiniz. Yeni hücumçu ilə bu problemin həll olunacağına inanırsınız?
- Yaxşı hücumçu olsa, təbii ki, bizə köməyi çox dəyəcək. Mövsüm uzundur. Zədəlilər ola bilər. Komandaya kömək lazımdır.
