Əfran İsmayılov: Qrup mərhələsindən danışmaq hələ tezdir
"Qarabağ"ın yarımmüdafiəçisi Əfran İsmayılov Topaz Premyer Liqasının 3-cü turu çərçivəsində AZAL-a qarşı keçirdikləri oyundan (2:0) sonra azerisport.az saytının suallarını cavablandırıb.
- Matçla bağlı nə deyə bilərsiniz?
- Maraqlı görüş alındı. Yaxşı oynadıq və layiqli qələbə qazandıq.
- Deyəsən, öz oyununuzdan razı qalmamısınız...
- Mən komanda ilə birgə toplanış keçə bilmədim. Həmin vaxt Bakıda idim. Bu, oyunuma təsirini göstərir. Toplanışda iştirak etməyən futbolçu üçün mövsüm həmişə çətin keçir. Hiss edirəm ki, geri qalıram. Amma baş məşqçi sağ olsun ki, mənə oynamaq şansı yaradır. Əlimdən gələni edirəm ki, onun etimadını doğruldum.
- Meydana xeyli gənc oyunçu ilə çıxmağınız qələbə qazanmağınıza problem yaratmadı...
- Hə, onların çoxu ilə birgə oynamamışdım. Amma hamısı baş məşqçinin inamını doğrultdu. Şadam ki, qələbə qazandıq.
- "Qarabağ"ın bu heyətlə çempionatda uğur qazanması çətin olmayacaq?
- Əsas heyətin oyunçularına istirahət verilmişdi. Çünki yorğunluq var idi. Oyunlar arasındakı fasilə 5-6 günlük olsaydı, onlar meydana çıxardılar.
- Əlhərbi Əl-Jadeyuinin zədələnməsi sizin özünüzü göstərməyiniz üçün şans sayılai bilər?
- Futbolçularımızdan hansınınsa zədə almasını istəməzdim. Əlbəttə, zədədən qaçmaq çox çətindir. Sabah mən də zədə ala bilərəm, digər futbolçumuz d. On görə də buna görə oynamağımı şans adlandırmazdım. Əlhərbi zədəli olmayanda da hər ikimiz oynayırdıq. Qrafik çox gərgindir. Ona görə birimiz avrokubok, digərimiz çempionat oyununda meydana çıxır. Baş məşqçi necə qərar versə, elə də olur.
- İsveçrə "Yanq Boyz"u üzərində 1:0 hesablı səfər qələbəsindən sonra "Qarabağ"ın Avropa Liqasının qrup mərhələsinə vəsiqənin taleyinə 60-70 faiz aydınlıq gətirdiyini demək olar?
- Fikrimcə, hələ bu barədə danışmaq tezdir. Mən həmin oyunu kənardan izləyirdim. Biz birinci hissədə hücum edə bilmirdik. Rəqib isə qol vəziyyətləri yaratmasına baxmayaraq, yararlana bilmədi. Çətin qarşıdurmadır. İsveçrəlilərin qarşısını almaq çox çətindir.
- Siz Bakıdakı oyunun da çətin keçəcəyini düşünürsünüz?
- Təbii ki. "Yanq Boyz" daha çox hücum etməyə, qol vurmağa çalışacaq. Biz isə qapımızı toxunulmaz saxlamağa çalışmalıyıq.
