Aqil Məmmədov: Əvvəlki turlarda qələbə qazana bilməməyimizin səbəbini özümüz də bilmirik
"Neftçi"nin qapıçısı Aqil Məmmədov Topaz Premyer Liqasının 3-cü turu çərçivəsində "Sumqayıt"a qarşı keçirdikləri oyundan (2:1) sonra azerisport.az saytının suallarını cavablandırıb.
- Oyun barədə nə deyə bilərsiniz?
- Uşaqları təbrik edirəm. Bu gün yaxşı oynadılar. İsti havaya baxmayaraq, öz futbolumuzu sərgiləyə bildik. Tədricən özümüzə gəlirik. Gələcəkdə daha yaxşı olacağını düşünürəm.
- Bəs ilk iki turda niyə qələbə qazana bilmirdiniz?
- Özümüz də başa düşmürük. Belə hər şey yaxşıdır. Bizim üçün hər cür şərait yaradılıb. Meydanda isə heç nə alınmırdı. Oynamaq lazım idi. Bu gün öz oyunumuzu göstərməyi bacardıq. Baxmayaraq ki, matçın sonunda yorulmuşduq. Amma bunu isti hava ilə əlaqələndirmək olar.
- Bəlkə, heyətlə bağlı problem var idi?
- Düzdür, heyətdə çatışmazlıqlar var. Gənclərimiz çoxdur. Təcrübəli futbolçular da lazımdır.
- Buraxılan qolu necə şərh edərdiniz?
- Mənim səhvimdən qol buraxdıq. Mən elə bildim hakim qayda pozuntusuna görə oyunu saxlayacaq. Bu, mənə mane oldu. Zərbəyə hazır deyildim. Komandamız mənə görə uduzsaydı, özümü bağışlaya bilməyəcəkdim.
- Slovakiyalı yeni qapıçı - Mixal Peskoviç barədə nə deyə bilərsiniz?
- Ona uğurlar arzulayıram. Rəqabət daha da inkişaf etməyimizə kömək edəcək.
- "Neftçi"yə əcnəbi qapıçı lazım idi?
- Bəli. Təcrübəli qapıçıya həmişə ehtiyac var.
- Azarkeşlərin bu oyuna az maraq göstərməsini necə şərh edərdiniz? Yəqin ki, bir həftə öncə baş verənləri unutmayıblar...
- Azarkeşlərimizi başa düşürəm. Amma bu barədə danışmaq istəmirəm. Onları qələbələrimizlə sevindirmək istəyirik.
- Azərbaycan yığmasına siz də dəvət almısınız?
- Bu dəvətə görə şadam. Ümid edirəm ki, uğurlu oyunlar keçirə biləcəyik. Xorvatiya ilə ev oyununda heç-heçə, Malta üzərində səfərdə qələbə çox yaxşı olardı. Xalqımız uğurlu nəticələrə layiqdir.
- Millidəki əsas rəqibiniz Kamran Ağayev Türkiyənin "Karşıyaka"nın heyətindəki debüt matçında uğursuz çıxış etdi. Robert Prosineçkinin sizə əsas heyətdə şans verəcəyini gözləyirsiniz?
- Buna baş məşqçi qərar verir. Kimin oynamasının fərqi yoxdur. Əsas qələbə qazanmaqdır.
