Ayxan Abbasov: Qarabağ üçün səfərdəki 1:0 hesablı qələbə böyük üstünlükdür
"Qarabağ"ın sabiq müdafiəçisi Ayxan Abbasov bu komandanın Avropa Liqasının pley-off mərhələsi çərçivəsində İsveçrənin "Yanq Boyz" klubuna qarşı keçirdiyi ilk oyundan (0:1) danışıb. Azerisport.az saytına açıqlamasında o, öncə bunları söyləyib:
"Çox çətin oyun oldu. Rəqib də güclü komanda idi. "Qarabağ" qalib gəlsə də, "Yanq Boyz"a qarşı mübarizə aparmaq çətin idi. Konkret hücum və ya əks-hücum futbolu sərgiləyən komandalar var. Amma "Yanq Boyz"un oyun üslubu çox müxtəlifdir. Ona görə də bu rəqibə qarşı mübarizə aparmaq çətin olur".
"Səfərdə 1:0 hesablı qələbə böyük üstünlükdür. Amma Bakıda çətin olacaq. Ola bilər ki, "Yanq Boyz" "Qarabağ"ı hələ yaxşı öyrənməyib. Amma indi isveçrəlilər Ağdam klubunun zəif və güclü cəhətlərini daha yaxşı bilir. "Yanq Boyz" güclü komandadır. Vaxtilə səfərdə "Fənərbaxça" kimi kluba qalib gəliblər. Amma "Qarabağ"ın da avrokuboklarda böyük təcrübəsi var. Hansı ki, bu, Avroliqadakı digər təmsilçimiz "Qəbələ"də çatışmır. Belə təcrübə toplamaq üçün heç olmasa iki mövsüm qitə arenasında kifayət qədər oyun keçirmək lazımdır".
"İlk oyun göstərdi ki, "Qarabağ" rəqibindən daha yaxşı hazırlıq keçib. Bakıdakı oyunda komandamız daha çox əks-hücumlara üstünlük verəcək. Rəqibin isə ilk dəqiqələrdən hücuma atılacağını gözləmək olar. Düzdür, əksi də mümkündür. Çünki qol buraxacaqları halda işləri daha da çətin olacaq. İstənilən halda öz oyunlarını sərgiləməyə və qol vurmağa çalışacaqlar. "Yanq Boyz" almanlar kimi oynayırlar. Hesabın necə olmasından asılı olmayaraq, sistemlərində dəyişiklik etmirlər. Reynaldonun İsveçrədə qol vurmaq şansları var idi. Sadəcə, süni qazon amili sözünü dedi. Fikrimcə, onun Bakıda da qol vurmaq üçün şansı olacaq".
Abbasov Riçard Almeydanın Berndə vurduğu qoldan da danışıb: "Riçard əla oyun keçirdi. O, "Qarabağ"ın orta sahədəki əsas silahlarından biridir. Qol isə doğrudan da çox gəzl alındı. Onun bu qolu Zaur Həşimovun "Olimpik"ə vurduğu topu xatırlatdı. Zaura da dedim ki, Riçard sənin zərbəni təkrarladı. Sadəcə, Zair sağ ayaqla vurmuşdu, Almeyda isə sol. Gözəl qol alındı".
