Eddi İsrafilov: Köhnə zədə Azərbaycan millisinə kömək etməyimə problem yaratmayacaq

Azərbaycan yığmasının və İspaniyanın "Eybar" klubunun yarımmüdafiəçisi Eddi İsrafilovun azerisport.az saytına müsahibəsi

- Yeni komandanıza uyğunlaşma necə gedir?
- Hər şey yaxşıdır, uyğunlaşıram. Mənim üçün yeni yerdir. Komanda yoldaşlarımla yaxşı münasibətim var. Bura xoşuma gəlir. Özümü yaxşı hiss edirəm.

- Komandanızın keçirdiyi yoxlama oyunlarında meydana çıxmadınız. Zədəniz ciddidir?
- Bu, köhnə zədəmin yaratdığı problemlərdir. Hansı ki, "Qranada" oynayarkən almışdım. İlk oyunumuzda hiss etdim ki, mənə nəsə mane olur. Amma ciddi bir şey yoxdur. Hazırda həm məşq edirəm, həm də zədəmi sağaldıram.

- Robert Prosineçki sizi yığma komandamızın qarşıdakı Xorvatiya və Malta ilə oyunlarına dəvət edib...
- Buna sevinirəm. Mən yenidən Azərbaycan yığmasının düşərgəsinə gəlməyə hazıram və bunu çox istəyirəm. Ümid edirəm ki, etimadı doğrulda biləcəyəm.

- Siz indi yığmaya kömək edə biləcək durumdasınız?
- Birmənalı şəkildə bəli. Yenidən yığmaya gəlib, kömək etməyi həddən artıq arzulayıram. Köhnə zədəm mənə mane olmayacaq.

- Bəs millimizin qarşıdakı oyunlarından nə gözləyirsiniz?
- Bizim üçün vacib oyunlardır. Komanda artıq seçmə mərhələdə iki oyundur uduzmur. Bu seriyanı davam etdirmək istəyirik. İlk oyun Bakıda Xorvatiyaya qarşı olacaq. Bu oyun liderə qarşı necə mübarizə aparacağımız baxımından vacibdir.

- Robert Prosineçki ilə çalışmaq necədir?
- Gördüyünüz kimi, artıq nəticə var. Ümid edirəm ki, gələcəkdə hər şey daha yaxşı olacaq.