Nurlan Novruzov: Zirə ən güclü klublardan biri olacaq
"Zirə"nin hücumçusu Nurlan Novruzovun azerisport.az saytına müsahibəsi
- Nəhayət, Robert Prosineçki sizi də milli komandaya dəvət etdi...
- Yığma komandada oynamaq mənim ən böyük arzumdur. Çalışacağam ki, mənə veriləcək şansdan layiqli şəkildə yararlanım. Allah eləsin ki, hər şey yaxşı olsun.
- Baş məşqçinin sizinlə bağlı fikrini niyə dəyişdiyi ilə maraqlanmamısınız?
- Xeyr. Bu barədə heç nə bilmirəm.
- Sentyabrın 3-də Xorvatiya, 6-da Malta ilə oyun var. Nə gözləyirsiniz?
- Əlbəttə, çətin oyunlar olacaq. Xüsusilə də Xorvatiya ilə görüş. Rəqibin heyətində çoxlu ulduz futbolçular var. Amma biz layiqli oynamağa və uğur qazanmağa çalışacağıq. Mənə elə gəlir ki,Malta ilə görüş də çətin olacaq. Çünki hazırda Avropada zəif rəqib yoxdur.
- Yeni klubunuz "Zirə"dəki ilk oyununuzu 2-ci turda keçirdiniz. Komandya uyğunlaşa bilmisiniz?
- Hələ yox. Bir qədər vaxt lazımdır. Necə də olmasa, həm klub, həm də futbolçular mənim üçün yenidir.
- Niyə məhz "Zirə"?
- Düzdür, başqa klublardan da təkliflər var idi. Amma mən "Zirə"ni seçdim. Burada məni hər şey qane edir.
- Bəs Türkiyə klubuna keçidiniz niyə alınmadı?
- Mən Türkiyədə oynamağı çox istəyirdim. Amma ora gedəndən, vəziyyəti görəndən sonra fikrimi dəyişdim. Orada demək olar ki, hər klubun problemi var. Ona görə də bizim Premyer Liqada oynamaq Türkiyə birinci divizionuna getməkdən daha yaxşıdır.
- "Zirə"də də bombardirlik keyfiyyətlərinizi nümayiş etdirə biləcəskiniz?
- Buna çalışacağam. İnanıram ki, yeni komandama da faydalı olacağam. Eyni zamanda bombardirlər yarışında da mübarizə aparmağa çalışacağam.
- Qarşıda sizi "İnter"lə oyun gözləyir...
- Bu oyuna ciddi hazırlaşırıq. Çox ümid edirəm ki, biz bu komanda ilə görüşdə istədiyimiz oyunu sərgiləyə və qələbə qazana biləcəyik.
- Klub rəhbərliyi qarşınıza hansı vəzifəni qoyub?
- Klubumuz Premyer Liqada yenidir. İndidən "Zirə"dən uğur gözləmək bir qədər yanlış olardı. Amma biz imkan daxilində uğurlu çıxış etmək üçün əlimizdən gələni edəcəyik. "Zirə" gələcəkdə ölkənin ən iddialı klublarından biri olacaq. Mən buna inanıram.
