Nazim Süleymanov: Ümid edirəm ki, hər iki klubumuz Avroliqanın qrup mərhələsində oynayacaq

Azərbaycanın U-19 yığmasının baş məşqçisi Nazim Süleymanov Avropa Liqasındakı təmsilçilərimizin - "Qarabağ"la "Qəbələ"nin bu turnirin pley-off mərhələsi çərçivəsində müvafiq olaraq İsveçrənin "Yanq Boyz" və Yunanıstanın "Panatinaikos" klublarına qarşı keçirdikləri ilk oyunları şərh edib. Azerisport.az saytına açıqlamasında o, bunları söyləyib:

"Panatinaikos" çox təcrübəli komandadır. Ona qarşı oynamaq heç də asan deyil. Buna baxmayaraq, "Qəbələ"ni siyahıdan silmək olmaz. Ev oyunundakı qolsuz heç-heçə cavab matçına ümid etməyə şərait yaradır.

"Qarabağ"a gəlincə, bu komandadan biz Çempionlar Liqasının qrup mərhələsinə vəsiqə qazanmağı gözləyirdik. Ötən gün onlar İsveçrədə yaxşı oyun sərgilədilər və "Yanq Boyz" üzərində qələbəyə layiq idilər. Amma 1:0 hesablı qələbə ağdamlıları arxayınlaşdırmamalıdır. Cavab oyununda da qələbə qazanmaq lazımdır. Bunu yalnız Avroliqanın qrup mərhələsinə vəsiqə qazanmaq üçün yox, eyni zamanda Azərbaycanın UEFA reytinqindəki mövqeyini yaxşılaşdırmaq üçün etmək lazımdır. Ümid edirəm ki, hər iki klubumuz pley-off mərhələsinə vəsiqə qazanacaqlar. Çünki biz hələ belə bir uğura heç vaxt imza atmamışıq ki, iki klubumuz birdən avrokubokların qrup mərhələsində oynasın".