Roman Qriqorçuk: Qəbələni Mançester Yunaytedlə səhv salmayın
"Qəbələ"nin baş məşqçisi Roman Qriqorçuk Avropa Liqasının pley-off mərhələsi çərçivəsində Yunanıstanın "Panatinaikos" klubuna qarşı keçirdikləri ilk oyundan sonra fikirlərini açıqlayıb. Azerisport.az xəbər verir ki, ukraynalı mütəxəssis 0:0 hesabıyla başa çatan görüşdən sonra öncə bunları söyləyib:
- Yaxşı nəticəyə imza atmaq istəyirdik. Amma buna nail ola bilmədiyimiz üçün təəssüflənməyə də ehtiyac yoxdur. Futbolçuların meydandakı faydalı işinə görə iradım ola bilməz. Birinci hissənin sonlarına doğru sərgilədiyimiz oyun daha çox xoşuma gəldi. Fikrimcə, bu oyunla daha yaxşı nəticəyə imza ata bilərdik.
- "Qəbələ" bu oyunla Avroliqanın qrup mərhələsində dördüncü yerdən yuxarı qalxa bilməz...
- Sizin bu fikrinizlə razı deyiləm. Belə oyun nə deməkdir ki? Siz bizi "Mançester Yunayted"lə səhv salmayıb. Məncə, biz əvvəlki oyunlardan daha yaxşı oynadıq. Hələ bundan sonra daha yaxşı oynayacağıq. Transferlər etməyi də düşünürük. Sadəcə, bu gün sonradan meydana çıxan Samir Zərgərovla Asif Məmmədov düzgün oynamadı.
- Oyundan öncə rəqiblə bağlı çox ehtiyatlı danışırdınız. Amma oyun göstərdi ki, "Panatinaikos" elə də təhlükəli komanda deyil. Razısınız?
- Biz başqa cür oynamağa alışmışıq. Müdafiədə bəzi çatışmazlıqları yoluna qoymaq lazımdır. Həm də biz yaxşı hazırlıq dövrü keçməyə vaxt tapa bilmədik. Bu oyunda sürətli əks-hücumlar qurmağı bacarmadıq. Halbuki, "Panatinaikos"a qarşı məhz sürətli əks-hücumlar təşkil etmək lazım idi.
- Cavid Hüseynovun yoxluğu hiss olunurdu?
- O, bizim üçün vacib oyunçudur və yoxluğu itkidir. Amma pley-off mərhələsində olan komanda kimi bir futbolçudan asılı ola bilmərik. Çünki hücumları təkcə Cavidlə təşkil etmirdik, bütün komanda ilə oynayırdıq. Fikrimcə, bu barədə danışmamalıyıq. Güclü futbolçularımız var. Onlar hələ sözlərini deyəcəklər.
- Hansı mövqelərə transferlər gözləyək?
- Biz pley-off mərhələsi ərəfəsində transferlər etmək istəsək də, alınmadı. Komandada güclü rəqabətə ehtiyac var. Hələ ki, alınmır. Axtarışdayıq. Lakin transfer xatirinə transfer etmək fikrimiz yoxdur.
