Yannis Anastasiu: Bizi Bakıda ancaq qələbə qane edəcək

"Qəbələ"nin Avropa Liqasının pley-off mərhələsindəki rəqibi - Yunanıstanın "Panatinaikos" klubunun baş məşqçisi Yannis Anastasiu Bakıda keçiriləcək ilk oyun öncəsi fikirlərini açıqlayıb. Azerisport.az xəbər verir ki, o, bu gün baş tutan mətbuat konfransında öncə bunları söyləyib:

"Hər bir komandada eniş dövrü olur. Bu, şübhəsizdir. Komandam peşəkarlıq baxımından bu oyuna hazırdır. "Qəbələ" ilə oyun bizim üçün vacibdir. Bütün gücümüzlə mübarizə aparacağıq".

Anastasiu heyətdəki itkilər barədə danışıb: "Düzdür, heyətimizdə itkilər var. Amma heyətlə bağlı problem yoxdur. Sabah bizi yalnız qələbə qane edəcək".

Afinalıların çalışdırıcısı mətbuat konfransı zamanı daha çox gülümsəməsi ilə diqqət mərkəzinə düşdü. O, buna da münasibət bildirib: "Bilmirəm, nədənsə gülümsəmək istəyirəm. Amma məndə sabahkı oyun öncəsi heç bir arxayınlıq yoxdur. Gözəl bilirəm ki, bizə çətin olacaq. Oyunçularıma inanıram".

Rəqib çalışdırıcı Azərbaycan futbolu barədə ətraflı məlumatının olmadığını, amma "Qəbələ"ni yaxşı analiz etdiyini dilə gətirib: "Azərbaycan futbolu barədə çox az məlumatım var. Lakin "Qəbələ"nin Avroliqanın cari mövsüm keçirdiyi oyunlara baxmışam. Hətta Premyer Liqada "Qarabağ" və AZAL ilə oyunlarını da izləmişəm. Rəqibi pis öyrənməmişik".

Anastasiu "Qəbələ"nin bundan əvvəlki mərhələdə mübarizədən kənarlaşdırdığı Kipr "Apollon"una görə heç bir qisas haqda düşünmədiklərini söyləyib: "Xeyr. Heç bir revanş olmayacaq".