Kamran Quliyev: Neftçiyə niyə 3 xal verməliyik ki?
"Sumqayıt"ın prezidenti Kamran Quliyev Topaz Premyer Liqasının üçüncü turunda qarşılaşacaqları "Neftçi" ilə oyunda rəqibə üç xal verəcəklərinə dair mətbuatda yayılan iddialara münasibət bildirib. Azerisport.az saytına açıqlamasında o, bunları söyləyib:
"Sumqayıt" heç vaxt heç bir klubla belə bazarlığa getməyib, getməyəcək də. Bizim öz hədəflərimiz var. Hətta mövsümün sonu da olsa, bizə xal lazım olmasa da, yenə heç bir kluba güzəştə getmərik. Niyə "Neftçi"yə üç xal verməliyik ki? Bu, bizi istəməyənlərin uydurmasıdır. Yaxşı klub yaratmışıq, geridə qalan dörd ildə çox şeyə nail olmuşuq. Bu klub ona görə yaradılmayıb ki, kiməsə xal verək. Qarşıdakı oyunda da ancaq qələbə üçün çalışacağıq. Çünki üç xal bizə "Neftçi"yə lazım olduğu qədər lazımdır".
