Araz Abdullayev: Neftçi azarkeşinin həbs olunması mənə çox pis təsir etdi

"Neftçi"nin kapitanı Araz Abdullayev Topaz Premyer Liqasının 2-ci turu çərçivəsində "İnter"ə qarşı keçirdikləri oyundan sonra komandanın azarkeşi Nurlan Əzizlə olan münaqişədən, eləcə də onun 5 sutkalıq həbsindən danışıb. Azerisport.az saytına açıqlamasında o, öncə bunları söyləyib:

"Düzünü deyim ki, azarkeşimizin həbs olunması mənə çox pis təsir etdi. O, bizim azarkeşimizdir. Stadiona da bizə görə gəlir. Bizim qələbəmizi görmək istəyir. Biz də onlar kimi qələbə qazanmağı çox istəyirik. Amma komandamızın müdafiəçisi oyunun əvvəlində meydandan uzaqlaşdırıldı. Bu, bizim planlarımızı korladı və müsbət nəticə qazanmaq vəzifəsinin öhdəsindən gəlməyimizi daha da çətinləşdirdi. Buna baxmayaraq, biz əlimizdən gələni etdik. Sadəcə, alınmadı".

Yarımmüdafiəçi oyundan sonra baş verənlərə belə aydınlıq gətirdi: "Azarkeşlərimizi başa düşürəm. Onlar udsaq da, uduzsaq da, bir yerdə olmağımızı istəyirlər. Mən uduzmağı sevmirəm. Nə vaxt uduzsaq, azarkeşlərimizin ürəyincə olmayan nəticə qazansaq, onların qarşısına çıxmağa utanıram. Bu oyundan da sonra uduzmağımıza baxmayaraq, onlara yaxınlaşıb, bizi dəstəklədiklərinə görə təşəkkürümüzü bildirdik.

Həmin azarkeşlə də mənim aramda xüsusi heç nə baş vermədi. O, sadəcə, bizim qələbə qazanmağımızı istəyirdi. Azarkeşlərimizə hörmətim var. Çalışacağıq ki, qarşıdakı turlarda onları qələbə ilə sevindirək".