Məhəmmədəliyev: Biz hesabı açdıqdan sonra hücumlarımızı davam etdirməliydik
"Sumqayıt"ın qapıçısı Şahruddin Məhəmmədəliyev Topaz Premyer Liqasının 2-ci turu çərçivəsində "Xəzər Lənkəran"a qarşı keçirdikləri oyunu şərh edib. O, 1:1 hesabıyla bitən görüşlə bağlı azerisport.az saytına bunları söyləyib:
"Düzünü deyim ki, Bəxtiyar Həsənalızadənin cərimə zərbəsini dəqiq yerinə yetirəcəyinə əmin idim. Çünki o, cərimə zərbələrini elə yerinə yetirir ki, sanki penalti vurur. Onun çox yaxşı zərbələri var. Bəxtiyar bunu "Xəzər Lənkəran"la oyunda bir daha sübut etdi".
Qapıçının sözlərinə görə, komandasının qələbə hesabını sonadək qoruya bilməməsinə səbəb müdafiəyə tez çəkilmələri olub: "Xəzər Lənkəran" standart vəziyyətdən yaxşı yararlanır. Biz Bəxtiyarın qolundan sonra hücumlarımızı davam etdirməliydik. Qapımın toxunulmazlığını qorumağı çox istəyirdim. Amma təəssüf ki, buna nail ola bilmədim. İlk iki turda daha çox xal toplamağımız mümkün idi. Eyni zamanda isə bu oyunlarda uduza da bilərdik.
Üçüncü turda "Neftçi" ilə qarşılaşacağıq. Həmin oyuna da qələbə üçün çıxacağıq. Yaxşı hazırlaşacağıq".
