Böyükağa Hacıyev: Neftçi uçuruma gedir
"Neftçi"nin sabiq baş məşqçisi Böyükağa Hacıyev bu komandanın Topaz Premyer Liqasının 2-ci turu çərçivəsində "İnter"ə məğlubiyyətinə şərh verib. Hacıyev azerisport.az saytına açıqlamasında klubun uçurumda olduğunu deyib:
"Sabiq komandam haqda danışmaq çətindir. Çünki, biz "Neftçi"ni belə görmək istəməzdik. Əvvəllər "İnter"lə oyuna xüsusi hazırlaşırdıq. İndi isə çempionatda intriqa qalmayıb. Bütün görüşlər adi matç xarakteri daşıyır. "Bankirlər"ə məğlubiyyəti qəbul etmək olar. Bu gün "İnter" əzmkarlıq və ustalığı sayəsində qalib gəldi. Sözsüz, "ağ-qaralar" azlıqda qaldığına görə çətin duruma düşdü. Amma belə oynamaq olmaz. Komanda hər zaman yüksək yerlər uğrunda mübarizə aparıb. Gəncləşdirmə siyasəti olsa belə, gələcəyi düşünmək gərəkdir. Etiraf etməliyəm ki, "Neftçi" uçuruma gedir. Komandaya dəstək olmaq vacibdir. Uduzmaq ayıb deyil. Futbolda hər zaman qalib gəlmək olmur. Amma oyun göstərib uduzmalısan".
Böyükağa Hacıyev eyni zamanda komandanın kapitanı Araz Abdullayevin azarkeşlə münaqişəsinə də münasibət bildirib: "Oyuna stadiondan deyil, evdən baxırdım. Abdullayevin elə hərəkətə yol verdiyini görməmişəm. Əgər mətbuatda yazılanlar doğrudursa, onda təəssüflənirəm. Futbol tamaşadır, futbolçu tamaşaçıyla - azarkeşlə kobud davranmamalıdır. Bu gün azarkeş işini atıb futbola baxmaq üçün stadiona gəlir. Nəticə olmayanda hissiyatla hərəkət edə bilər. Futbolçu hər zaman ona hörmətlə davranmalıdır. Əgər Abdullayev belə edibsə, mən çox təəssüflənirəm. Stadionda belə hərəkətlər təkcə klubun deyil, futbolun adına böyük ləkədir".
