Nicat Qurbanov: Zirəyə zəif komanda gözü ilə baxılmasını istəmirik
"Zirə"nin yarımmüdafiəçisi Nicat Qurbanov Topaz Premyer Liqasının 2-ci turu çərçivəsində "Kəpəz"ə qarşı keçirdikləri oyunu şərh edib. Azerisport.az saytına açıqlamasında o, 1:1 hesabıyla bitən matçla bağlı bunları söyləyib:
"Çətin və maraqlı oyun oldu. "Kəpəz" ilk dəfə öz meydanında oyun keçirirdi. Komanda qələbə qazanmaq üçün əlindən gələni etdi. Yaxşı oyun alındı. Sonda isə hər iki komanda 1 xal əldə etdi. Gəncədə futbola maraq doğrudan da böyükdür. Ötən gün mən buna bir daha əmin oldum. Açığını deyim ki, böyük futbolun Gəncəyə qayıtmasına çox sevinirəm. Azarkeşlərə də minnətdaram ki, bu oyunu belə maraqlı etdilər. Onlarla futbol daha maraqlı olur.
Öz komandamıza gəlincə, yeni olsaq da, qarşımızda müəyyən hədəflər var. Hər bir oyuna ciddi yanaşırıq. Bizə zəif komanda gözü ilə baxmalarını istəmirik. "Simurq" həmişə digər komandalar üçün başağrısı sayılırdı. Biz ondan da artığına nail olmaq istəyirik. "Zirə"nin bu mövsüm öz gücünü nümayiş etdirməsi üçün əlimizdən gələni edəcəyik".
