Laşa Kasradze: Neftçi ilə matçda qələbəyə oynayacağıq

"İnter"in müdafiəçisi Laşa Kasradzenin azerispot.az saytına müsahibəsi

- Premyer Liqaya məğlubiyyətlə başladınız. "Xəzər Lənkəran"a ilk turdakı məğlubiyyəti nə ilə izah edə bilərsiniz?
- "Xəzər Lənkəran"la oyundan öncə Avropa Liqasında çətin oyunlarımız olmuşdu. Xüsusilə, İspaniya "Atletik"i ilə görüşlərdə çox güc sərf etdik. Bilbao təmsilçisi ilə cavab görüşündən sonra isə istirahət, yaxşı hazırlaşmaq üçün vaxtımız olmadı. "Xəzər Lənkəran"la oyunda necə yorğun olduğumuz aşkar hiss olunurdu. Buna baxmayaraq, qol vəziyyətlərimiz oldu. Təəssüf ki, onlardan yaralana bilmədik. Şanslarımızdan yararlana bilsəydik, məğlubiyyət olmazdı.

- Yəni həmin məğlubiyyətin tək səbəbi yorğunluqdur?
- Bəli, tamamilə doğrudur.

- İkinci turda rəqib "Neftçi"dir...
- Bu oyuna yaxşı hazırlaşmışıq. Öz futbolumuzu sərgiləyib, qələbə qazanmaq istəyirik.

- Rəqibiniz ilk turda "Kəpəz"lə sülh bağlayıb...
- "Neftçi" həmişə yaxşı komanda olub. Yüksək səviyyəli futbolçuları var. Onlarla bu dəfəki görüşümüzün necə alınacağını oyun özü göstərəcək. İndidən konkret nəsə demək istəmirəm.

- Keçmiş klubunuz AZAL da yaxşı günlərini yaşamır. Yəqin ki, bu komandanı "İnter"ə dəyişdiyinizə görə peşman deyilsiniz...
- İndi AZAL barədə heç nə bilmirəm. Orada baş verənlərdən, necə heyət qurduqlarından xəbərsizəm. Amma indidən nəticə çıxarmaq üçün də tezdir. Hər şeyin necə alınacağını qarşıdakı turlar göstərəcək.