Aleksey Qay: Pantinaikos ÇL-də uğursuz çıxış etsə də, bizə qarşı daha güclü oynaya bilər
"Qəbələ"nin yarımmüdafiəçisi Aleksey Qay Topaz Premyer Liqasının 2-ci turu çərçivəsində AZAL-a qarşı keçirdikləri oyundan (2:0) sonra azerisport.az saytının suallarını cavablandırıb:
- Oyunla bağlı nə deyə bilərsiniz?
- Ən vacib olan qələbə qazanmağımızdır. Belə gərgin qrafik çərçivəsində xal itirmək heç də arzulanan hal deyil. Ona görə bu baxımdan oyunu bizim aktivimizə yazmaq olar. Oyuna gəlincə, səhvlərimiz oldu. Səhvsiz alınmır. Ola bilər ki, istədiyimiz kimi çıxış edə bilmədik. Amma qələbə qələbədir. Hər qələbə komandaya əlavə inam qazandırır.
- "Qarabağ"la heç-heçə etdiyiniz oyunda daha inamlı təsir bağışlamışdınız. "Qəbələ"nin nisbətən zəif rəqibə qarşı belə zəif çıxış edəcəyini çox az adam gözləyirdi...
- Biz özümüz də bunu gözləmirdik. Həmişə yaxşı oynamaq istəyirik. Amma reallığı da nəzərə almaq lazımdır. Bu gün parlaq oyun sərgiləməsək də, qalib gəlməyi bacardıq. İndiki mərhələdə ən vacib olan da budur.
- Qarşıda Avropa Liqasının pley-off mərhələsi çərçivəsində Yunanıstan "Panatinaikos"u ilə çətin oyunlar var...
- Hələ bu oyunlarla bağlı heç nə deyə bilmərəm. Çünki hələ bu komandanı tam analiz etməmişik. Hər bir oyuna ayrıca hazırlaşırıq. Tezliklə Yunanıstan klubunu daha ciddi şəkildə analiz edib, hazırlaşacağıq.
- Klubunuzdakı son olayları, rəqibin adını nəzərə alsaq, psixoloji baxımdan çətinlik, pessimist fikirlər yoxdur ki?
- Nə pessimism? Ancaq optimist düşünürük. Aydın məsələdir ki, hər şeyə hazır olmaq lazımdır. Amma ən yaxşısına da ümidi itirməmək lazımdır.
- "Panatinaikos" əvvəlki illərlə müqayisədə o qədər də əzəmətli təsir bağışlamır...
- Sizinlə razılaşmamaq olmaz. Amma onu da unutmamaq lazımdır ki, bu, pley-off mərhələsidir və burada zəif rəqib olmur. Onlar Çempionlar Liqasında uğursuz çıxış etsələr də, bizimlə oyunlara daha istəkli çıxa bilərlər. İstənilən halda ciddi hazırlaşmalı və hər şeyə hazır olmalıyıq.
