Sergey Zenyov: Bu fikirlə meydana çıxsaydıq, qalib gələ bilməzdik
"Qəbələ"nin hücumçusu Sergey Zenyov Topaz Premyer Liqasının 2-ci turu çərçivəsində AZAL-a qarşı keçirdikləri səfər oyunundan (2:0) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Ağır oyun oldu. Əsas odur ki, qələbə qazana bildik. Bu, bizim çempionatın yeni mövsümündəki ilk qələbəmiz oldu. Çempionatın startında vacib üç xala yiyələndik.
- "Qəbələ" qalib gəlsə də, çox da yaxşı oynamadı. Niyə?
- Bunu artıq oyundan sonra soyuq başla aydınlaşdıracağıq. Səhvlərimizi bizə söyləyəcəklər.
- Qarşıda komandanı Yunanıstanın "Panatinaikos" klubu ilə vacib səfər oyunu gözləyir. Təsadüfən, gücünüzü həmin oyuna saxlamağa çalışmırdınız?
- Xeyr, belə olduğunu düşünmürəm. Biz belə fikirlə meydana çıxsaydıq, qalib gələ bilməzdik. "Panatinaikos"a görə gücümüzə qənaət etməklə bağlı fikir yox idi.
- İlk qoldan sonra oyunçularınız Cavid Hüseynovun formasını nümayiş etdirdilər...
- Gəlin bu barədə danışmayaq.
- Oyununuzdan razı qaldınız?
- Bu barədə baş məşqçimiz və mütəxəssislər rəy bildirə bilər.
- "Panatinaikos"la oyuna artıq çox az vaxt qalıb. Bu görüşdən nə gözləyirsiniz?
- Bizi ciddi rəqiblə iki ağır oyun gözləyir. "Panatinaikos" böyük tarixə malik klubdur. Onlara qarşı var gücümüzlə mübarizə aparacağıq. Bizi ancaq qələbə qane edəcək.
- Bacaracaqsınız? Axı favorit yunanlar hesab olunurlar...
- Qələbəmizə inanırıq. Əks halda meydana çıxmağın mənası yoxdur.
