Vüqar Nadirov: İlk turdakı qələbənin İnterin yorğunluğu ilə bağlı olduğunu düşünmürəm

"Xəzər Lənkəran"ın hücumçusu Vüqar Nadirovun azerisport.az saytına müsahibəsi

- Siz də daxil olmaqla yeni transferlər komandaya cəlb olunana kimi "Xəzər Lənkəran" "Sumqayıt" və "Rəvan"la da qarşılaşacaq. Sizcə, yoxluğunuzda komanda daha altı xal qazana biləcək?
- Komandamız hər oyuna qələbə üçün çıxır. Hər iki oyunun çətin keçəcəyini bilirik. "Sumqayıt" gənclərdən qurulmuş komandadır. "Rəvan" isə çox motivasiyalıdır. Allah eləsin ki, qarşıdakı oyunlarda da qələbə bizimlə olsun.

- Açılış turunda "İnter" üzərində 2 cavabsız qolla qalib gələcəyinizi gözləyirdiniz?
- Qələbəyə ümidli idik. Komandaya inanırdıq. Uşaqlar yaxşı uğur qazandılar.

- "Xəzər Lənkəran" yeni transferlərinə də qovuşandan sonra necə olacaq?
- O zaman komandamızın gücü daha da artacaq. Biz bir ailəyik. Bizim yoxluğumuzda isə gənclərin çox yaxşı oynadığını demək lazımdır.

- Oyunu kənardan izləmək ağır deyildi?
- Əlbəttə, ağır idi. Hətta meydandan kənarda da çox həyacan keçirdik. Sözlə də olsa, gənc futbolçulara dəstək və göstəriş verməyə çalışırdıq.

- "İnter"lilər bu məğlubiyyəti İspaniya "Atletik"i ilə oyundan sonrakı yorğunluqla izah edirlər...
- Mən belə deməzdim. Çünki çempionat ayrıdır, avrokuboklar ayrı. Bu turnirlərə hazırlıq da fərqlidir. Düşünmürəm ki, rəqibin yorğunluğu bizə çox kömək etdi.

- Siz heyətə qoşulandan sonrakı ilk oyununuz "Qarabağ"a qarşı olacaq. Bu komanda ilə görüş sizin üçün nə dərəcədə vacibdir?
- Mənim üçün hər oyun vacibdir. Hər bir komanda həm mənim, həm də kollektivimiz üçün çətin və güclü rəqibdir. Biz öz futbolumuzu oynamağa çalışacağıq.