Ramazanov: Yeni klubumdakı debüt matçımda qırmızı vərəqə mənim üçün çox ağır oldu
"Sumqayıt"ın hücumçusu Ağabala Ramazanov Topaz Premyer Liqasının 1-ci turu çərçivəsində "Rəvan"a qarşı keçirdikləri oyunun birinci hissəsində birbaşa qırmızı vərəqə ilə meydandan qovulmasını şərh edib. Azerisport.az saytına açıqlamasında o, bunları söyləyib:
"Qırmızı vərəqə ilə bağlı nə deyə bilərəm ki? Hakim öz qərarını verdi. Ona görə bu haqda heç nə deyə bilmərəm. Sadəcə, qırmızı vərəqə almaqla komandamı azlıqda qoydum. Bu üzdən uşaqlara çətin oldu. Amma onlara halaldır ki, on nəfərlə qalsalar da, sonadək layiqli mübarizə apardılar. "Sumqayıt"dakı debüt matçımda qırmızı vərəqə almağım mənim üçün ağır oldu. Artıq heç nə etmək olmaz. Qarşıdakı oyunlarda komandama uğurlar arzulayıram. Cəzam başa çatandan sonra isə əlimdən gələni edəcəyəm ki, komandam uğur qazansın".
