Mahmud Qurbanov: Cavid Hüseynovun olmaması milli üçün də itkidir
Azərbaycan yığmasının məşqçisi Mahmud Qurbanov millimizə də dəvət olunan "Qəbələ"nin yarımmüdafiəçisi Cavid Hüseynovun məlum həbsinə münasibət bildirib. Azerisport.az saytına açıqlamasında o, bunları söyləyib:
"Bu, xoşagəlməz faktdır. Heç kim belə olmasını istəməzdi. Ölən jurnalistin yaxınlarına başsağlığı verirəm. İnsan ölümünə heç cür haqq qazandırmaq olmaz. Özü də burada jurnalist ölümündən söhbət gedir. Belə bir hadisənin baş verməsi çox böyük məyusluq yaradır. Çünki burada futbolçu adı da hallanır.
Məlum səbəblərdən Cavid Hüseynov yığmamızın Xorvatiya və Malta ilə oyunlarında yer almayacaq. Baxmayaraq ki, o, son dövrlər yaxşı formada idi. Belə olan halda təbii ki, bu, bizim üçün itkidir.
Bu, milliyə təsir edə bilərmi? Müxtəlif səbəblərdən tez-tez hansısa futbolçunun milliyə kömək edə bilməməsinin şahidi olmuşuq. Əlbəttə, bu dəfə səbəb tam fərqlidir. Amma istənilən halda komandamız yenə öz oyununu sərgiləməyə hazırlaşacaq. Bu baxımdan heç bir problem olmayacaq".
