Qarabağın yeni stadionunun açılışı gecikə bilər
"Qarabağ" klubu bir neçə gün öncə yeni inşa etdirdikləri stadionun açılış tarixinin müəyyənləşdiyini açıqlamışdı. Azerisport.az xəbər verir ki, Ağdam klubu bu barədə sosial şəbəkələrdən birindəki rəsmi səhifəsində açıqlama yaymışdı.
Açıqlamada bildirilirdi ki, avqustun 15-də Topaz Premyer Liqasının ikinci turunda keçiriləcək "Rəvan"la oyundan əvvəl "Qarabağ"ın yeni stadionunun açılışı olacaq. Hətta açılışda klub prezidenti Abdulbari Gözəlin də iştirak edəcəyi bildirilirdi.
Lakin Peşəkar Futbol Liqasından aldığımız məlumata görə, onlar Suraxanıda yerləşən bu arenada təftiş aparmayıblar. Çünki Ağdam klubu onlara bunun üçün heç bir müraciət ünvanlamayıb.
Bu üzdən də böyük ehtimalla "Rəvan"la oyun paytaxtdakı digər arenalardan birində keçiriləcək. Sözügedən qarşılaşmaya ev sahibliyi etməyə əsas namizəd stadionlar isə "Bayıl Arena", "Dalğa Arena" və İsmət Qayıbov adına Bakıxanov qəsəbə stadionudur. Ağdam klubunun ötən mövsüm ev oyunlarını keçirdiyi Tofiq Bəhramov adına Respublika stadionu isə hazırda təmirdədir. "Qarabağ" mərkəzi arenada avrokubok oyunlarını keçirə biləcək. Hazırda bu stadion komandanın İsveçrə "Yanq Boyz"u ilə görüşü üçün hazırlanır.
PFL-dən onu da istisna etmədilər ki, "Qarabağ" vaxtında müraciət etsə və aparılacaq təftişlər uğurlu alınsa, "Rəvan"la oyun elə Suraxanıdakı yeni stadionda da baş tuta bilər.
