Qara Qarayev: Malaqanın baş məşqçisi oyundan sonra məni təriflədi

Azərbaycanın gənclərdən ibarət yığma komandasının hücumçusu Qara Qarayev İspaniyanın "Malaqa" klubunun heyətində "Real Betis"ə qarşı keçirdikləyi yoxlama oyununu (4:0) şərh edib. Azerisport.az saytına açıqlamasında o, qol vurduğu bu görüşlə bağlı bunları söyləyib:

"Baş məşqçi məni ikinci hissədə meydana buraxdı. Mənə elə gəlir ki, pis oynamadım. Öncə qol ötürməsi verdim, daha sonra isə özüm qol vurdum. Daha sonra ikinci qolu da vurmağıma baxmayaraq, hakim ofsayd olduğunu bildirdi. Oyundan sonra baş məşqçi məni təriflədi. Yoxlama oyunu olsa da, 4 cavabsız qolla qalib gəlməyimizə sevindim. İngilis dilini yaxşı bildiyim üçün baş məşqçi ilə ünsiyyət qurmaqda problem olmur. O, mənə bu tempdə davam etməyi tapşırdı. Hələ "Malaqa"nın oyun üslubuna tam uyğunlaşmamışam. Ümid edirəm ki, məndə hər şey alınacaq və əsas heyətin oyunçusu ola biləcəyəm. Sadəcə, bunun üçün vaxt lazımdır. Rəqabət aparacağım futbolçular arasında ispanlar da var, əcnəbilər də. Qollarımın davamını gətirəcəyimə ümidliyəm".