Məhəmməd Qurbanov: Yeni mövsümə tam hazırıq

"Neftçi"nin hücumçusu Məhəmməd Qurbanovun azerisport.az saytına müsahibəsi

- "Neftçi"ni Premyer Liqanın yeni mövsümünə tam hazır saymaq olar?
- Hazırlaşmaq üçün kifayət qədər vaxtımız oldu. Yaxşı hazırlıq keçdik, yoxlama oyunlarında qüvvəmizi sınadıq. Fikrimcə, Premyer Liqaya tam hazırıq.

- İlk matç "Kəpəz"lədir...
- Bu, ilk turdur. Çempionata qələbə ilə başlamağı hamımız çox istəyirik.

- Rəqib barədə nə deyə bilərsiniz?
- "Kəpəz"in indiki durumu barədə elə də çox məlumatım yoxdur. Ona görə də necə komanda olduğunu deyə bilmərəm. Amma istənilən halda bizə qarşı yaxşı komandanın mübarizə aparacağını düşünürəm.

- Sizi "Neftçi"nin əsas heyətində görə biləcəyik?
- Bu barədə danışmaq tezdir. Bunu zaman göstərəcək.

- "Neftçi" çempionluğa köklənib?
- "Neftçi" kimi komandalar həmişə qarşısına yüksək hədəflər qoyur. Bu mövsüm də istisna deyil. Yaxşı nəticəyə nail olmağa çalışacağıq.

- Komanda mövsümə ev oyunu ilə başlayır. Bunun hansısa üstünlüyü var?
- Premyer Liqaya doğma meydanda start vermək xoşdur. Azarkeşlərimiz qarşısında qələbə qazanmaq istəyirik.

- Premyer Liqaya yeni komandalar gəlib. Ümumiyyətlə, Azərbaycan çempionatının yeni mövsümü barədə nə düşünürsünüz?
- Çempionat hələ başlamayıb. Bu, əsl marafondur. Ona görə də indidən konkret fikir söyləmək tezdir. Lakin əminəm ki, maraqlı bir çempionat olacaq.