Aleksey Qay: Qəbələ güclü komandadırsa, Cavidlə Ürfanın yoxluğu hiss olunmamalıdır

"Qəbələ"nin futbolçusu Aleksey Qay Avropa Liqasının üçüncü təsnifat mərhələsi çərçivəsində Kiprin "Apollon" klubuna qarşı keçirdikləri cavab matçından (1:0, ilk oyun 1:1) sonra azerisport.az saytının suallarını cavablandırıb.

- "Qəbələ" çətinliklə də olsa, Avroliqanın pley-offuna vəsiqə qazana bildi. Bu uğurunuzu necə şərh edə bilərsiniz?
- Oyun başa çatan kimi onu analiz etmək, hansısa dəqiq fikir irəli sürmək bir qədər çətindir. Amma mənə elə gəlir ki, biz yaxşı oynadıq. Əsas odur ki, yaxşı müdafiə olunduq və qol buraxmadıq. Müdafiə olunmağı bacardığımızı göstərdik. Amma buna baxmayaraq, hələ görüləsi işlərimiz çoxdur.

- Oyun zamanı komanda yoldaşlarınız arasında bəzən anlaşılmazlıq yaranırdı...
- Mən elə düşünmürəm. Mənə elə gəlir ki, hər şey qaydasındadır. Kiprlilərlə oyunlarda biz çox çalışdıq və fikrimcə, pis alınmadı.

- Pley-off mərhələsində sizi çətin rəqiblər gözləyir. "Qəbələ"dən yenə uğur gözləyə bilərik?
- Biz uğur qazanmağa davam etmək istəyirik. Bu, futboldur, həmişə komandalar mübarizəyə bərabər şanslarla başlayırlar. Biz də Avroliqanın qrup mərhələsinə vəsiqə qazana bilərik. Baxmayaraq ki, ilk dəfə pley-offda çıxış edəcəyik. Odur ki, hər şey ola bilər.

- Pley-offa çıxmaq artıq uğurdur, ya hədəf qrup mərhələsinə çıxmaqdır?
- Gəlin tələsməyək. Proqnoz verməyi xoşlamıram. Bugünkü günlə yaşamaq lazımdır. "Apollon"la oyun artıq geridə qaldı. Qarşıda isə bizi Azərbaycan çempionatı çərçivəsində "Qarabağ"la çətin oyun gözləyir.

- Cavid Hüseynovla Ürfan Abbasov Avroliqanın pley-offunda ilk oyunu buraxmalı olacaq. Onların yoxluğu çıxışınıza təsir göstərməyəcək?
- Onlar əsas heyət oyunçularıdır. Amma ehtiyatda bizdən heç də geri qalmayan yaxşı futbolçularımız var. Ona görə də layiqli əvəzedicilərin tapılacağına əminəm. Komandamız doğrudan da güclüdürsə, Cavidlə Ürfanın yoxluğu hiss olunmayacaq.