Apollonun baş məşqçisindən azərbaycanlı jurnalistlərə hörmətsizlik

Kiprin "Apollon" klubunun baş məşqçisi Pedro Emanuel Avropa Liqasının üçüncü təsnifat mərhələsi çərçivəsində "Qəbələ"yə qarşı keçirdikləri cavab matçından sonra azərbaycanlı jurnalistlərə qarşı hörmətsizlik edib. Azerisport.az xəbər verir ki, rəqib komandanın çalışdırıcısı 0:1 (ilk oyun 1:1) hesabıyla başa çatan görüşdən sonra mətbuat konfransında fikirlərini açıqlayıb.

Lakin o, azərbaycanlı yox, kiprli jurnalistlərin suallarını cavablandıracağını bəyan edib. Bunu görən azərbaycanlı jurnalistlərin böyük əksəriyyəti boykot edərək, konfrans zalını tərk ediblər.

Qeyd edək ki, portuqaliyalı mütəxəssis oyundan bir gün öncə də jurnalistlər üçün mətbuat konfransı keçirməkdən imtina etmişdi.