Tahir Gözəl: Qarabağla fəxr edirəm, oyundan razı qaldım

Azərbaycan çempionu "Qarabağ"ın vitse-prezidenti Tahir Gözəl UEFA Çempionlar Liqasının üçüncü təsnifat mərhələsi çərçivəsində Şotlandiya "Seltik"inə qarşı keçirdikləri cavab matçını (0:0, ilk oyun 0:1) şərh edib. Azerisport.az saytına açıqlamasında o, bunları söyləyib:

"Pis oynamadıq. Sonadək mübarizə apardıq. Amma alınmadı. "Seltik" güclü idi. Heyətində "Mançester Siti"də, Hollandiya yığmasında oynamış futbolçuları var. Bütün bunları nəzərə almaq lazımdır. "Qarabağ"ın sərgilədiyi oyundan razı qaldım. Klubumuzla fəxr edirəm. Qurban Qurbanova inanıram. Yeni transferlər hər oyunda daha da artıracaqlar və bu komandanın bir hissəsinə çevriləcəklər. Siz daha güclü "Qarabağ" görəcəksiniz".