Qriqorçuk: Kiprdə olanlar biabırçılıq idi, həmin olaylar Bakıda təkrarlanmamalıdır
"Qəbələ"nin baş məşqçisi Roman Qriqorçuk Avropa Liqasının üçüncü təsnifat mərhələsi çərçivəsində Kiprin "Apollon" klubuna qarşı cavab oyunu öncəsi mətbuat konfransında fikirlərini açıqlayıb. Azerisport.az xəbər verir ki, ukraynalı mütəxəssis öncə cavab matçının "Apollon"un baş məşqçisi Pedro Emanuelin həmyerliləri - portuqaliyalı hakimlər tərəfindən idarə olunacağına münasibət bildirib:
- Bu, məni ümumiyyətlə narahat etmir. Belə məqamların şərh olunması hətta məni təəccübləndirir. Bu, diletantlıqdır, gülməlidir. 21-ci əsrdə yaşayırıq, bu insanlar isə öz işlərinin peşəkarıdırlar. UEFA ən yaxşı hakimlərə güvənir. Mən portuqaliyalı hakimi tanımıram. Amma bilirəm ki, o, rəqibin baş məşqçisinin həmyerlisi olduğunu düşünməyəcək. O, komandalara, futbolçuların davranışına, öz imicinə baxır.
- Cavab matçından nə gözləyirsiniz?
- Bizi ağır oyun gözlədiyinə əminəm. "Apollon" çox güclü rəqibdir. 1:1 hesabı da hələ heç nədən xəbər vermir. Rəqibin heyətində sürətli və yüksək səviyyəli futbolçular var. Ona görə də rəqib futbolçuları neytrallaşdırmaq barədə düşünməliyik. Daha təşkilatlanmış oyun sərgiləməyə çalışmalıyıq. Ən nəhayət, növbəti mərhələyə necə vəiqə qazanmaq haqda düşünməliyik.
- "Qarabağ" mübarizəni dayandırsa, əsas ümidlər "Qəbələ"yə yönələcək. Bu fakt azərbaycanlı futbolçularınıza nə dərəcədə təsir göstərə bilər?
- Mən futbolçularımın bu haqda düşünməsini istəməzdim. Hər bir təmsilçimizin uğuruna azarkeşlik etməliyik. Əsas ölkənin imicidir. Hamımız birlikdə mərhələ adlasaq, daha yaxşı olar. Avrokubokların qrup mərhələsinə "Qarabağ"la birgə vəsiqə qazanmağımızı istəyərdim. Həm də mənim haqqımda "üç təmsilçisi qrup mərhələsində çıxış edən ölkədə işləyir" deyilməsi mənə də çox xoş olardı.
- Cavid Hüseynov oynayacaq?
- Cavidin oynamasını istəyirəm. O, bizim üçün önəmli fiqurdur. Onun ilk oyundakı davranışına haqq qazandırmayacağam. Amma cəzalandırılmamasına da təəccüblənmərəm. Çünki öncə "Apollon" azarkeşlərinin davranışlarına diqqət yetirilməli idi. Onlar penalti təyin olunan kimi əllərinə keçəni meydana atırdılar. Həmin əşyalardan biri futbolçularımıza dəysəydi, hansısa ölsəydi, necə olacaqdı? Həmin vaxt heç Cavid yada da düşməyəcəkdi. Əgər Hüseynovu cəzalandırsalar, kiprliləri daha sərt cəzalandırmalıdırlar. Sənin ölkənin bayrağını cırırlarsa, yandırırlarsa, futbolçun nə etməlidir? Hüseynovun jesti bütün bu baş verənlərdən sonra oldu. Baxmayaraq ki, onun bu hərəkətinə haqq qazandırmıram.
Larnakada baş verənlər Kipr futbolu üçün biabırçılıq idi. Şəxsən mən orada baş verənlərdən şoka düşmüşdüm. Bizim azarkeşlər onlara onların metodu ilə cavab verməməlidirlər. "Qəbələ" azarkeşlərinə sözüm budur ki, gəlin bizə azarkeşlik edin, meydana heç bir əşya atmayın, başqa ölkələrin bayraqlarına toxunmayın. Mən hər kəsi futbolu belə şeylərdən təmizləməyə çağırıram. Qalan hər şeyə meydanda aydınlıq gətirəcəyik.
- Amma "Qəbələ" azarkeşləri də Tiflis "Dinamo"su ilə oyunda Gürcüstan bayrağını yandırmışdılar...
- Mən belə hallara qarşıyam. Bayrağı yandırmaq olmaz. Futbolu siyasətə qarışdırmaq olmaz. Ancaq futbol - vəssalam! Hər yerdə buna çalışmaq lazımdır.
