Böyükağa Hacıyev: Qarabağın erkən qol vurması vacibdir

"Neftçi"nin sabiq çalışdırıcısı Böyükağa Hacıyev Azərbaycan klublarının avrokuboklardakı şanslarını qiymətləndirib. Azerisport.az saytına açıqlamasında o, UEFA Çempionlar Liqasının üçüncü təsnifat mərhələsində Şotlandiyanın "Seltik" klubu ilə mübarizə aparan və ilk oyunda 0:1 hesabıyla uduzan "Qarabağ"a inandığını deyib:

"Azərbaycan çempionunun işi asan olmayacaq. Bununla belə Qurban Qurbanovun komandasına inanıram. Bakıda Şotlandiya təmsilçisinə qarşı layiqli mübarizə aparmaq mümkündür. Sözsüz ki, pley-offa yüksəlmək şansları var. Bunun üçün erkən qol vurmaq vacibdir. "Qarabağ" heyətin əksər futbolçularını qoruyub, üstəlik yeni transferlərlə güclənib. Ona görə komandanın uğur qazanacağına ümid edirəm. Azərkeşlərin dəstəyi komandaya əlavə güc verəcək".

Avropa Liqasının üçüncü təsnifat mərhələsində Kipr "Apollon"u ilə qarşılaşan "Qəbələ"yə gəlincə Böyükağa Hacıyev Roman Qriqorçukun komandasının evdə daha inamlı oynamağa məcbur olduğunu deyib: "Səfərdə 1:1 hesabı əla fürsətdir. Komandamız evdə daha inamlı oynamalıdır. Rəqibə sözümüzü oyunla deməliyik. Başqa heç bir şeyə ehtiyac yoxdur. Sözsüz ki, Kipr azarkeşlərinin çılğınlığı bizə məlumdur. Onlara ən yaxşı cavab qələbə olacaq".

İspaniyanın "Atletik" klubunu qəbul edəcək "İnter" barədə danışan Hacıyev "bankirlər"in cari mövsüm maksimum nəticə göstərdiklərini bildirib: "Maliyyə probleminə baxmayaraq, "İnter" iki mərhələ keçdi. Ona görə komandaya təşəkkür düşür. İspanlara qarşı paytaxt təmsilçisindən layiqli oyun gözləyirəm".