Fikrət Hüseynov: Təsəvvür edə bilməzdim ki, klublar nə vaxtsa teleyayımdan gəlir əldə edər
AZAL-ın vitse-prezidenti Fikrət Hüseynov Premyer Liqanın yeni mövsümünün yayım hüququnun CBC telekanalına satılmasına münasibət bildirib. Azerisport.az saytına açıqlamasında o, bunları söyləyib:
"Bu xəbəri eşitməyimizə çox sevindik. Çünki Azərbaycan futbolu tarixində hələ belə bir hal olmamışdı. Artıq 10 ildir bu klubda çalışıram və təsəvvürümə də gətirə bilməzdim ki, nə vaxtsa teleyayımdan gəlir əldə edə bilərik. Gəlirin bütün klublar arasında bərabər şəkildə bölünməsi faktı da çox xoşdur. Ola bilər ki, bu, elə də böyük məbləğ deyil. Amma başlanğıc olaraq klublar üçün yardımçı olacaq. AFFA, PFL və Klublar Komitəsi sağ olsun ki, bu məsələdə belə bir irəliləyişə nail oldular. AZAL-da çoxlu gənc futbolçu var. Təbii ki, canlı yayımlanacaq oyunlarda onlar da özlərini yaxşı tərəfdən göstərməyə çalışacaqlar".
