Skott Braun: Qarabağı qol buraxmadan cəzalandıra bilərik

Şotlandiyanın "Seltik" klubunun kapitanı Skott Braun UEFA Çempionlar Liqasının üçüncü təsnifat mərhələsi çərçivəsində "Qarabağ"a qarşı keçiriləcək cavab oyunu öncəsi fikirlərini açıqlayıb. Azerisport.az xəbər verir ki, o, klub saytına açıqlamasında bunları söyləyib:

"Erkən qol vursaq, çox yaxşı olardı. Eyni zamanda komanda olaraq yaxşı müdafiə olunmalıyıq. Qol buraxmadan fərqlənəcəyimizə inanırıq. Müdafiəyə də, yarımmüdafiəyə də, hücuma da inanmaq lazımdır. Hər kəs öz işini layiqincə görsə, müsbət sonluğa ümid edə bilərik".

Rəqibin kapitanı "Qarabağ" haqda da danışıb: "Qarabağ" çox texnikalı komandadır. Heyətində bacarıqlı futbolçular var. Onlar həm fərdi, həm də komanda oyunu ilə yaxşı təsir bağışlayırlar. Amma bizim komanda da ÇL-in digər iştirakçıları qədər yaxşı kollektivə malikdir. Sadəcə, bunu növbəti dəfə sübut etməyimiz lazımdır".

Matçın keçiriləcəyi Tofiq Bəhramov adına Respublika stadionunda qazonun ideal vəziyyətdə olmamasına toxunan Skott bunları dilə gətirib: "Mən analoji şərtlər altında bir neçə dəfə oynamışam. Məsələn, gənclərdən ibarət Şotlandiya yığmasının heyətində Makedoniyada çıxış edərkən. Özü də həmin oyun günortanın istisində keçirilmişdi. Bu, heç də xoş deyildi. Amma biz hər şeyin öhdəsindən gəlməyi bacarmalıyıq".

Braunun sözlərinə görə, onun komandası uğur qazanmaq üçün ilk növbədə "Qarabağ"ın istədiyi kimi oynamasına mane olmalıdır: "Oyuna, topa nəzarəti öz əlimizdə saxlamağa çalışmalıyıq. Matçda diqtə edən tərəf olsaq, "Qarabağ"ın çox şansı olmaz".